Duke u bazuar në një rregullore të re të miratuar në mënyrë të njëanshme Komisioni për Etikën në Kuvend vendosi të hënën të përjashtojë nga punimet e Kuvendit 19 deputetë të Partisë Demokratike pas tentativës së tyre për të bllokuar seancën plenare të enjten.
Masa disiplinore ndaj 19 deputetëve të opozitës u mor në një mbledhje jopublike online të Komisionit për Etikën pas një kërkese të 7 deputetëve socialiste.
Vendimi parashikon përjashtim 20 ditë për deputetin Ervin Salianji dhe 10 ditë për 18 deputetë të tjerë; Albana Vokshi, Sorina Koti, Elda Hoti, Lindita Metaliaj, Isuf Çela, Tritan Shehu, Lefter Gështenja, Helidon Bushati, Xhelal Mziu, Edmon Spaho, Oerd Bylykbashi, Ervin Salianji, Saimir Korreshi, Kasëm Mahmutaj, Ramadan Likaj, Kastriot Piroli, Qani Xhafa, Lodovik Hasani dhe Luan Baçi.
Salianji e quajti vendimin, “një akt të paprecedentë” ndaj opozitës.
“Rreth 50 përqind e grupit parlamentar demokrat do të përjashtohen nga Kuvendi, praktikisht duke iu hequr përkohësisht mandatin parlamentar të dhënë me votë nga sovrani”- tha ai në një dalje për mediat.
Sipas tij, kjo është një trajtim i deputetëve “me një urrejtje armiqësore të verbër” dhe tha se PD e konsideron këtë si “shpallje lufte” ndaj opozitës.
“I bëjmë thirrje Parlamentit Europian të dërgojë një mision monitorues në Shqipëri për të ndaluar degjenerimin e Kuvendit dhe kthimin e tij në shina eurpiane, larg prej stilit putinian të Dumës ruse”- përfundoi Salianji.
Në seancën e fundit ai përdori një mjet zhurmues për të bllokuar seancën, ndërsa deputetët e tjetër bllokuan foltoren e Kuvendit me pankarta protestuese kundër kryeministrit Edi Rama ku lexohej; “Vrasës i parlamentarizmit”, “Vrasës i demokracisë”.
Kjo lloj forme e protestës u vendos pasi mazhoranca përdori forcën e kartonave për të rrëzuar kërkesat për ngritjen e komisioneve hetimore parlamentare dhe kërkesën për riformatim të komisionit bipartizan për reformën zgjedhore.
Masat disiplinore u ashpërsuan me nismën e shumicës e cila futi në rregulloren e Kuvendit, duke rritur afatin e përjashtimeve nga 10 ditë deri në 60 ditë, pasi opozita nisi protestat me tymuese, mjete zhurmuese dhe përmbysje karrigesh në seancat plenare.
