Drejtori i Përgjithshëm i Burgjeve, Admir Abrija dha dorëheqjen të mërkurën, duke paraqitur sipas Ministrisë së Drejtësisë arsye personale.
Një zëdhënës i ministrisë i tha BIRN se dorëheqja e Abrisë do të shqyrtohej po të mërkurën nga Këshilli i Ministrave, i cili merr edhe vendimin për zëvendësimin e tij.
Admir Abrija u emërua në krye të Drejtorisë së Burgjeve në nga ministri i drejtësisë Ulsi Manja, më 20 dhjetor të vitit 2021 dhe zëvendësoi në këtë post Agim Ismailin. Abrija ka shërbyer më herët në Gardën e Republikës dhe Policinë e Shtetit në pozicione të ndryshme.
Dorëheqja e tij nga detyra vjen disa muaj pas incidentit të rëndë të dhjetorit të vitit të shkuar në burgun e sigurisë së lartë në Peqin, ku Sokol Mjacaj vrau një prej bashkëvuajtësve, plagosi një tjetër dhë kërcënoi me armë oficerët e policisë së burgjeve.
Ndërkohë, një investigim i BIRN i publikuar në dhjetor 2023 gjeti se shkelje të regjimit të sigurisë dhe trajtime të privilegjuara ndodhnin rëndom në sistemin e burgjeve në Shqipëri. Investigimi zbuloi se ish-zyrtarët e lartë të Partisë Socialiste në pushtet të arrestuar për korrupsion e shpërdorim detyre dhe anëtarët e krimit të organizuar gëzonin privilegje dhe kushte favorizuese, në shkelje të rregullave të sigurisë dhe ligjit për trajtimin e të dënuarve.