Policia e Shtetit njoftoi të hënën më 4 mars ndalimin në Emiratet e Bashkuara Arabe të 32-vjeçarit Merxhan Çeliku, i akuzuar nga Prokuroria e Posaçme, SPAK, si pjesëtar i një grupi të strukturuar kriminal që përfitonte shuma të mëdha parash, duke mashtruar shtetas në disa vende të Evropës. Sipas policisë, qëllimi i ndalimit të Çelikut është ekstradimi i tij drejt Shqipërisë.
Në kuadër të këtij hetimi të shtrirë në disa vende evropiane, në shtator të vitit të kaluar, u ndalua në Dubai, Amant Josifi, ish-këshilltar politik i ish-ministres Olta Xhaçka, pasi ishte shpallur në kërkim nga autoritetet e spanjolle të drejtësisë.
Sipas Europol, autoriteteve spanjolle dhe atyre shqiptare, organizata “Milton Group” ku akuzohet se bënte pjesë Josifi Çeliku, ka mashtruar mijëra persona në Spanjë dhe vende të tjera të BE-së si dhe ka përfituar përmes mashtrimit dhjetra milionë euro.
Në disa operacione të zhvilluara në tetor-nëntor 2022, Struktura e Posaçme Kundër Korrupsionit dhe Krimit të Organizuar, SPAK, në bashkëpunime me autoritetet spanjolle dhe Europol, bastisi 6 qendra thirrjesh telefonike në Shqipëri të lidhura me ‘Milton Group' dhe arrestoi 4 të dyshuar. Josifi dhe Çeliku nuk u gjetën atëherë, por u shpallën në kërkim.
Para se të shpallej në kërkim si i dyshuar për përfshirje në mashtrim, Josifi punoi nga muaji dhjetor 2018 deri në maj 2020 si këshilltar politik i ish-ministres së Jashtme, Olta Xhaçka gjatë kohës që ajo drejtonte Ministrinë e Mbrojtjes. Ai po ashtu është dhe ish-partner biznesi i vëllait të kryeministrit shqiptar, Olsi Rama.