Prokuroria ka kërkuar të premten konfisikimin e pasurive të ish-zyrtares së lartë, që u zbuluan pasi shtëpia e saj u vodh nga pastruesja. Në një njoftim për shtyp Prokuroria e Tiranës bën me dije se ka kërkuar konfiskimin e pasurive të Alda Klosit, përfshi shumat cash prej 368 mijë lekësh 15600 dollarësh dhe 462.950 euro. Po ashtu kërkohet konfiskimi i një apartamenti dhe i një makine.
“Këto pasuri nuk janë të justifikuara, pasi nuk mbulohen me të ardhura të ligjshme dhe derisa nuk janë të deklaruara, nuk provohet ligjshmëria e tyre”, thuhet në njoftimin e prokurorisë.
Klosi, ish-shefja e kabinetit të ish-ministrit të Shtetit për Rindërtimin dhe Programin e Reformave, Arben Ahmetaj, u dënua disa javë më parë me 2 vjet e 6 muaj burgim, pasi u gjet fajtore për fshehje të pasurisë. Pasuria e paligjshme e saj u zbulua nga prokuroria pasi vetë Klosi denoncoi në polici se ishte vjedhur.
Pas njoftimit të vjedhjes së banesës së Klosit në rrugën e Kosovarëve në Tiranë në dhjetorin e vitit 2022, policia arrestoi Rozeta Dobin dhe Havier Dobin, nënë e bir, nën akuzën e vjedhjes pasi në shtëpinë e tyre u gjet një shumë e konsiderueshme parash ndërsa Havierit iu sekuestruan disa makina. Klosi deklaroi në polici më vonë se në çastin e vjedhjes, në banesë kishte pasur 120 mijë euro dhe 30 mijë dollarë krahas bizhuterive.
Policia mbajti nën përgjim në komisariat Rozeta Dobin, e cila punonte si pastruese dhe Havierin, ndërsa këta diskutuan për një shumë tjetër parash të fshehur në tubin e ventilatorit të kuzhinës. Policia nuk kishte gjetur këtë shumë në kontrollin e parë por kur rivizitoi banesën, zbuloi 404 mijë euro dhe 8500 dollarë. Në total policia gjeti 462,950 euro; 15,500 dollarë amerikanë dhe 368 mijë lekë që i përkisnin Klosit.
Hetimet zbuluan se vetë Klosi nuk i kishte deklaruar këto para dhe as pasuritë e tjera. Ajo u arrestua dhe u gjet fajtore për fshehje të pasurisë. “Sa më sipër, organi i prokurorisë konkludon se shuma e parave të sekuestruara në banesën e R. D dhe apartamenti/garazhi i blerë në vitin 2019 nga ish – bashkëshorti i saj A.K., janë fshehur dhe nuk janë deklaruar në ILDKPKI”, thuhet në njoftimin e akuzës.
Rozeta Dobi dhe i biri, të cilët u gjetën fajtorë për vjedhjen në shtëpinë e Klosit, u dënuan përkatësisht me 7 dhe 5 vjet burg.
