Prokuroria e Posaçme njoftoi të enjten arrestimin e 6 personave dhe shpalljen në kërkim të tre të tjerëve, të dyshuar si të përfshirë në kultivimin me kanabis të një sipërfaqeje prej 8 mijë metrash tokë në disa sera në zonën e Beratit.
Sadetin Hasaj banues në Koplik, Malësi e Madhe, Arben Vrapi banues në Drenovicë, Berat, Mustaf Manej banues në Gruemirë, Malësi e Madhe, Lulezim Bushataj, banues në Demiraj, Malësi e Madhe, Suad Smakaj, banues në Demiraj, Malësi e Madhe, Adiol Çifliku banues në Vodëz, Kuçovë, u arrestuan të enjten me akuzën e prodhimit të narkotikëve dhe krijimit të një grupi kriminal.
“Në datën 24.04.2024, hetues të Byrosë Kombëtare të Hetimit, në bashkëveprim me oficerë të policisë gjyqësore në Drejtorinë e Përgjithshme të Policisë së Shtetit, ekzekutuan masat e sigurimit personal “arrest në burg” ndaj 6 (gjashtë) personave nën hetim, konkretisht: Ndërkohë është bërë shpallja në kërkim për 3 (tre) persona të tjerë, ku gjatë kontrolleve nuk është bërë e mundur gjetja e tyre dhe ekzekutimi i vendimit të gjykatës për caktimin e masës së sigurimit personal “arrest në burg””, thuhet në njoftimin e SPAK.
Prokuroria po ashtu ushtroi kontrolle edhe në banesa të të arrestuarve në vitin 2022 dhe bëri me dije se sërish gjeti një sërë provash për aktivitet të paligjshëm. Gjatë këtyre kontrolleve, në banesën e njërit prej të hetuarve më parë, u gjetën dhe u sekuestruan 30 kubikë me fidanë kanabisi dhe fara kanabisi të kultivuara në ambient të mbyllur brenda njësisë së banimit, në katin e tretë, ku kishte instalime elektrike dhe pajisje elektrike (llamba) dhe mushama reflektuese.
Operacioni i parë ndaj këtij grupi u zhvillua në vitin 2022, ku në një territor të hapur u gjetën sipas SPAK 4 sera të mbyllura me plastmas, në sipërfaqen e të cilave u evidentua e instaluar linjë elektrike dhe linjë e furnizimit me ujë, 11 thasë plastmasi të zinj, të mbushur me material bimor lëndë narkotike cannabis sativa, me peshë totale 871 kg, dyshekë e jorganë dhe armë zjarri.
Për të njëjtën akuzë po hetohen me masa të ndryshme sigurie 11 persona, ndërsa 95 gra dyshohet se ishin punëtore në serat e kanabisit. “Gjithashu këtu u identifikuan si punëtorë në sera edhe 95 (nëntëdhjetë e pesë) persona të gjinisë femërore”, thuhet në njoftim.
