Akti ekspertimit i kryer nga dy ekspertë amerikanë, lidhur me shkaqet e mundshme që çuan në shpërthimin në Gërdec në vitin 2008, si dhe mënyra se si do të mundësohet pyetja e këtyre ekspertëve në Shtetet e Bashkuara të Amerikës, u diskutuan edhe në seancën e 2 majit, të enjten, mes ish-ministrit të Mbrojtjes Famtir Mediu e përfaqësuesve të tij ligjorë nga njëra anë dhe prokurorëve të SPAK nga ana tjetër.
Mediu nuk ishte i pranishëm të enjten. Dy avokatët e tij, Henrik Ligori dhe Ardian Visha u qëndruan pretendimeve se prokuroria duhet të qartësojë se si akti i ekspertimit dhe provat e paraqitura nga prokuroria, implikojnë ish-ministrin Fatmir Mediu në ngjarjen tragjike në Gërdec, ku humbën jetën 26 persona dhe u plagosën qindra të tjerë.
“Është barra e akuzës që të qartësojë shkakun, pasojën e ardhur dhe se si lidhet kjo me Mediun”, theksoi avokati Ligori.
Prokurori Klodian Braho vërejti se e kishin bërë gjithçka të qartë. Sipas tij, ishte problem i mbrojtjes përse nuk arrinte ta kuptonte. Prokurori tha se akti dhe provat tregojnë pasojat që kanë sjellë veprimet e ish-ministrit të Mbrojtjes i marrë i pandehur për “shpërdorim detyre”.
Avokatët e Mediut këmbëngulën që për çdo provë të paraqitur prokuroria duhet të evidentojë lidhjen me përgjegjësinë e të pandehurit. Sipas tyre, kjo mënyrë nuk po i lejon të ndërtojnë qëndrimin e tyre. Ata kërkuan më shumë kohë për të paraqitur qëndrimet dhe për të debatuar provat e prokurorisë, duke theksuar se tashmë do të duhej t'i ndërtonin duke ngritur dyshime e hipoteza se përse organi i akuzës i kishte paraqitur ato.
Më parë përfaqësuesit e prokurorisë kanë pohuar se analizën e detajuar të të gjithë provave lidhur me akuzën e ngritur, do ta paraqesin në konkluzionet përfundimtare.
Lidhur me mënyrën e pyetjes së ekspertëve, që sipas SHBA mund të japin deklarimet e tyre atyre para agjentëve të FBI-së, mbrojtësit e Mediut kërkuan që kjo procedurë të zhvillohet në prani të një avokati amerikan që mbron të pandehurin dhe me anë të një videokonference.
Edhe përfaqësuesi i viktimave, avokait Dorian Matlija kërkoi që ekspertët të pyeten përmes një videokonference. Prokurori Klodian Braho i kërkoi gjykatës që pyetja e ekspertëve të kryhet në formë ligjore që dëshmitë e tyre të konsiderohen si prova. Sipas tij, në të kundërt të lexohen deklarimet e dhëna prej ekspertëve në hetimin e mëparshëm.
Pasi u tërhoq, gjyqtarja Gjoka vendosi që ekspertët të pyeten nga agjentët e FBI-së, sipas procedurës që ndiqet në SHBA, në praninë e avokatit amerikan të zgjedhur prej të pandehurit. Seanca u shty për më datë 15 maj, në orën 10:00, kur pritet që mbrojtësit e Mediut të paraqesin qëndrimin e tyre lidhur me provat e prokurorisë.
Rihapja e çështjes ndaj Mediut u vu në lëvizje pas 12 vitesh me iniciativën e familjes së një prej viktimave të shpërthimit në mars 2008 në ambientet e ish “Brigadës së Tankeve”, me 26 humbje jete e qindra të plagosur. Sipas kërkuesve dhe SPAK, pas ndryshimeve ligjore të vitit 2012 dhe 2017, deputeti nuk ka më imunitet parlamentar për ndjekjen penale apo gjykimin e tij dhe për rrjedhojë nuk ekziston me asnjë pengesë për hetimin dhe gjykimin e Mediut, i cili akuzohet për “shpërdorim detyre”.