Një grup i vogël aktivistësh shpalosi një banderolë dhe hodhi fletushka mbi kokat e deputetëve gjatë seancës plenare të Kuvendit të Shqipërisë të enjten më 2 maj, duke kërkuar krijimin e kushteve për votimin e qytetarëve shqiptarë që jetojnë jashtë vendit, pavarësisht se nuk janë të pranishëm në territorin e Shqipërisë ditën e zgjedhjeve.
Banderola e protestuesve shkruante: “Dua të votoj më 2025”. Garda e Republikës, e cila është përgjegjëse për sigurinë e Kuvendit të Shqipërisë, ndërhyri pak minuta pas shpalosjes së banderolës për ta bllokuar atë. Mënyra se si protestuesit arritën të hyjnë në lozhat e Kuvendit pajisur me banderolë dhe materiale të tjera mbetet e panjohur.
Palët politike në Shqipëri ranë dakord në vitin 2020 që të ndryshonin Kodin Zgjedhor për të lejuar votimin e emigrantëve në vendet ku ata banojnë. Zbatimi i kësaj dispozite ligjore ka mbetur në letër që nga ajo kohë.
Në vitin 2022, Gjykata Kushtetuese konstatoi cënimin e të drejtës ligjore të fituar në vitin 2020 me kompromisin e Partisë Socialiste me deputetët rezervë të opozitës, në kushtet kur opozita konvencionale kishte braktisur parlamentin.
Nëse do të realizohet, palët politike kryesore do të duhet të bien dakord për ndryshime në Kodin Zgjedhor brenda këtij sezoni parlamentar, pra para fundit të korrikut të këtij viti.
Një komision parlamentar që është krijuar për të shqyrtuar ndryshimet në kodin zgjedhor, ku përfshihen shumë rekomandime të OSBE/ODIHR si dhe zbatimi i tre vendimeve të Gjykatës Kushtetuese, duket se nuk po ecën përpara, për aq sa dihet publikisht.
Gjithsesi, në të shkuarën, palët politike zakonisht kanë arritur kompromise të debatueshme edhe në çastin e fundit.