Prokurori Anton Pali i Prokurorisë së Durrësit do të përballet të mërkurën më 8 maj me Komisionin e Pavarur të Kualifikimit. Procesi i tij i vetingut po kryhet nga trupa e përbërë nga Etleda Çiftja, Lulzim Hamitaj dhe Brunilda Bekteshi.
Anton Pali e ka filluar karrierën në sistemin e drejtësisë në vitin 2005 si oficer i Policisë Gjyqësore, ndërsa u emërua prokuror në Prokurorinë e Vlorës në vitin 2016. Prej verës së vitit 2023, Pali e ushtron funksionin në Prokurorinë e Durrësit.
Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë familjare të prokurorit Anton Pali nga viti 2005 deri në fund të vitit 2019. [Kliko skedën në PDF].
Në deklarimin për herë të parë në vitin 2005, prokurori Anton Pali zotëronte pjesë takuese në pasuritë familjare pa një vlerë financiare, ndërsa në fund të vitit 2019, pasuria e tij kap vlerën e 9.5 milionë lekëve.
Ai zotëron familjarisht pasuri të paluajtshme me vlerë 6.2 milionë lekë, likujditete bankare prej 3 milionë lekësh si dhe një automjet me vlerë 200 mijë lekë.
Të ardhurat familjare gjatë periudhës deklaruese janë 13.8 milionë lekë, nga të cilat 38% kanë si burim pagën e subjektit, 22% pagat e familjarëve dhe gati 38% kanë si burim shitjen e pasurive të paluajtshme.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 4 vite, asnjëra prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi si “flamur të kuq” burimet financiare për blerjen e një apartamenti, nga të cilat 3 milionë lekë i janë dhënë nga babai përmes një deklarate noteriale.
Subjekti Anton Pali deklaron gjendjen e interesave private për herë të parë në vitin 2005 si oficer i Policisë Gjyqësore dhe pas një shkëputje disavjeçare rikthehet si subjekt deklarues me marrjen e detyrës së prokurorit nga viti 2016 e në vazhdim.
Në deklarimin Para Fillimit të Detyrës në vitin 2016, ai deklaron një apartament të blerë më 28.10.2008 me sipërfaqe 91.8m2 në Durrës, në shumën 6,159,780 lekë, me burim krijimi të ardhurat e shitjes së një objekti 3 katësh ku subjekti zotëronte 1/8 pjesë nga trashëgimia si dhe 3,000,000 lekë të dhëna nga babai, konfirmuar me deklarate noteriale të datës 10.3.2010. Deri në fund të vitit 2019, kjo hua rezulton e pashlyer.
Deklarata e pasurisë së vitit 2005
Deklarata Para Fillimit të Detyrës 2016
Deklarata e pasurisë së vitit 2016
Deklarata e pasurisë së vitit 2017
Deklarata e pasurisë së vitit 2018
Deklarata e pasurisë së vitit 2019
Për më shumë dokumente vizitoni databazën tonë dokumente.reporter.al
