Një punëtor ndërtimi humbi jetën të enjten në Shëngjin, pasi ra nga kati i 9 i objektit ku po punonte. Policia njoftoi se ngjarja ndodhi rreth orës 7 e 30 minuta të mëngjesit, në një kantier ndërtimi pallatesh në rrugën e Kunës, ndërsa viktima e këtij aksidenti në punë u identifikua si Emiliano Frroku 28-vjeç.
Frroku sapo kishte nisur punën në katin e 9 të objektit, kur ra nga lartësia.
Policia, e cila mbërriti menjëherë në vendin e ngjarjes, bëri me dije se ka nisur hetimet për zbardhjen e shkaqeve dhe rrethanave të këtij rasti. Grupi hetimor po verifikon kushtet e sigurisë në punë dhe dokumentacionin ligjor të kompanisë ku punonte 28-vjeçari, ndërsa pjesë e verifikimeve është bërë edhe Inspektorati Shtetëror i Punës.
Punëtorët e ndërtimit janë prej vitesh më të rrezikuar në Shqipëri dhe rëniet nga lartësia janë shkaku kryesore i vdekjeve në punë sipas të dhënave të Inspektoratit të Punës. BIRN ka gjetur më herët se pavarësisht aksidenteve të përsëritura kompanitë vijojnë të mos marrin masa sigurie.
