Dy drejtuesit kryesorë të opozitës, Sali Berisha dhe Ilir Meta, folën ashpër kundër nismës së qeverisë për rregullimin ligjor të surrogacisë ndërsa që të dy sinjalizuan një zhvendosje drejt së djathtës konservatore si platormë elektorale për zgjedhjet e ardhshme parlamentare.
Berisha, i cili gjendet nën arrest shtëpie nën akuzën e korrupsionit, të cilën e mohon, foli përmes një videokonference në një takim të zhvilluar në zyrat e partisë së tij nga një grup që u prezantua si “Koalicioni Shqiptar Pro Familjes dhe Jetës”.
Ai e cilësoi ligjin e propozuar si një iniciativë që ka për synim “rrënimin e kombit.”
“Rama me ligjin e tij zgjedh konceptin e fermës, apo fasonerisë për nënën shqiptare, e dekonfigurimit të plotë të familjes. Kjo është një përpjekje jashtë çdo lloj imagjinate,” deklaroi ai.
Pak më herët, aleati i tij, Ilir Meta, foli në një konferencë për shtyp për ta denoncuar nismën si “antikombëtare”.
“Shqipëria nuk mund të trajtohet si një kavie eksperimentale”- akuzoi Meta.
Shqipëria nuk ka pasur ndonjë forcë politike të pozicionuar si konservatore ndërsa Berisha ishte president në kohën kur Shqipëria lejoi për herë të parë abortin në vitin 1995, duke shfuqizuar legjislacionin komunist që e ndalonte dhe e dënonte me burg. Edhe Meta përfaqëson një forcë politike që zakonisht është prezantuar si e majtë, progresiste dhe proevropiane.
Por mungesa e një politike të tillë nuk ka penguar socialistët që të rekrutojnë në radhët e tyre deputetë me prirje konservatore dhe homofobe ndërsa PD-ja e Berishës dhe vetë Meta janë afruar gjatë viteve të fundit me teoritë e konspiracionit, të cilat aludojnë për plane kundër familjes apo kombit nga grupe të caktuara.
Qeveria ka propozuar një ligj për shëndetin riprodhues, i cili synon të rregullojë disa aspekte, përfshirë fekondimin in-vitro, donacionin në kuadër të riprodhimit apo surrogacinë, praktikën gjatë së cilës një grua rrit në barkun e saj fëmijën e një gruaje që nuk ka mundësi që ta rrisë vetë. Projektligji parashikon gjithashtu zgjatjen e kohës së lejuar për abort nga 12 në 14 javë.
Gjithsesi, surrogacia është një fenomen i debatuar ashpër në të gjithë botën, jo vetëm nga pikëpamja e besimit fetar por edhe nga pikëpamja etike, sepse në disa vende, rregullimi ligjor i kësaj praktike ka krijuar kushtet për shfrytëzimin e grave në gjendje të vështirë ekonomike përkundrejt pagesës për të lindur fëmijët e të tjerëve. Në mungesë të ligjit, praktika nuk ndalohet por as nuk rregullohet.
Edhe komunitetet fetare kanë shprehur kundërshtimin e tyre për nismën dhe kanë kërkuar që të dëgjohen nga qeveria dhe parlamenti për nismën.
Këshilli Ndërfetar i Shqipërisë doli të enjten me një deklaratë për mediat për të folur efektet negative që projektligji mund të ketë për shëndetin e individit, familjes dhe shoqërisë.
Nisma e qeverisë është akoma në fazën e konsultimit publik.