Gjyqtarja Fatime Deçolli e Gjykatës së Tiranës u përball të hënën më 3 qershor me Komisionin e Pavarur të Kualifikimit. Procesi i saj i vetingut po kryhet nga trupa e përbërë nga Lulzim Hamitaj, Etleda Çiftja dhe Brunilda Bekteshi.
Fatime Deçolli e ka filluar karrierën në sistemin e drejtësisë në fillim të viteve ’90 dhe ka punuar si gjyqtare dhe kryetare gjykate në Berat. Prej vitit 2010, Deçolli e ushtron funksionin në Gjykatën e Rrethit Tiranë.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë familjare të gjyqtares Fatime Deçolli nga viti 2003 deri në fund të vitit 2019. [Kliko për skedën në PDF].
Në deklarimin për herë të parë në vitin 2003, gjyqtarja Fatime Deçolli deklaronte pasuri familjare me vlerë 8.5 milionë lekë, ndërsa në fund të vitit 2019, pasuria e saj familjare kap vlerën e 27.2 milionë lekëve.
Ajo zotëron familjarisht pasuri të paluajtshme me vlerë 22.3 milionë lekë, likujditete bankare me vlerë 3.8 milionë lekë si dhe automjet me vlerë 900 mijë lekë. Gjithashtu, bashkëshorti i subjektit zotëron kuota me vlerë 36 mijë lekë në një fond pensioni.
Të ardhurat familjare gjatë periudhës deklaruese janë 40.3 milionë lekë, nga të cilat rreth 51% kanë si burim pagën e subjektit, 35% pagat e familjarëve, 7.2% dhuratat nga familjarët dhe 1.6% të ardhurat nga qiratë.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 15 vite, asnjëra prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi si “flamuj të kuq” deklarimin mbi një banesë private në emër të bashkëshortit si dhe përfitimet nga shitja e pasurisë së prindërve.
Më konkretisht në vitin 2005, subjekti Fatime Deçolli deklaron për herë të parë në emër të bashkëshortit një banesë private dhe truall në Berat të regjistruar në hipotekë me vlerën e 3 milionë lekëve. Nga deklarimi është e paqartë nëse kjo pronë është një aset shtesë apo rivlerësim aseti ekzistues. Në prona do të ishte një aset shtesë, subjekti do të rezultonte për vitin me mungesë burimesh për justifikimin e saj.
Në vitin 2009, subjekti deklaron blerjen e një apartamenti banimi me vlerë 82,600 euro, me burim kryesor një kredi bankare në vlerën e 45,000 eurove si dhe detyrimin e pashlyer ndaj firmës së ndërtimit në vlerën e 25,600 euro.
Në vitin 2016, bashkëshorti i subjektit deklaron shtesë në llogari bankare në vlerën e 15,953 euro me burim krijimi shitjen e pasurisë së paluajtshme në emër të mamasë.
Deklarata e pasurisë së vitit 2003
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016
Deklarata e pasurisë së vitit 2017
Deklarata e pasurisë së vitit 2018
Deklarata e pasurisë së vitit 2019
Për më shumë dokumente vizitoni databazën tonë dokumente.reporter.al
