Prokuroria e Posaçme kundër Korrupsionit dhe Krimit të Organizuar, SPAK njoftoi të mërkurën më 17 korrik rezultatet e hetimit ndaj një grupi të strukturuar kriminal me aktivitet kultivimin e bimëve narkotike në zonën e Shkodrës, si dhe ndalimin e 12 prej anëtarëve të kësaj organizate, 10 prej të cilëve janë lënë në burg.
Sipas SPAK, ndalimet kanë të bëjmë me hetimin e kryer për mbjelljen e 32 mijë rrënjëve Cannabis Sativa, të zbuluara në qershor të vitit 2022 në fshatin Vallas të Njësisë Administrative Oblike, Shkodër, nga ana e punonjësve të policisë të Komisariatit të Policisë Vendore. Parcelat ndodheshin rreth 100 metra largësi nga Xhamia e fshatit Vallas. Po ashtu, gjatë kontrollit në ambientet e përshtatuara për shërbim të lëndës narkotike, është konstatuar në proces tharje material bimor të pandara nga kërcelli ose në formë boçeje, në total në masën 246.5 kilogram.
Të proceduarit janë nën hetim dhe për gjetjen në tetor të atij viti të një sere të sajuar në një banesë, ku kanë qenë duke punuar disa gra, si dhe të rreth 86 kg hashash, pjesërisht i thatë dhe në proces tharje.
SPAK sqaron se gjykata ka miratuar kërkesën për caktimit e masës së sigurimit personal “arrest në burg” ndaj 10 personave të përfshirë në këtë veprimtari të paligjshme dhe për dy të tjerë për caktimin e masës “arrest në shtëpi”.
Po ashtu, në njoftim bëhet me dije se të mërkurën me 17 korrik u ekzekutuan masat e sigurimit për të 12 personat e hetuar.
