Prokuroria e Posaçme njoftoi të shtunën më 27 korrik përfundimin e hetimeve ndaj dy organizatorëve të një grupi të strukturuar kriminal, që nëpërmjet mashtrimit online përmes call-center-ave në Shqipëri dhe Itali u vodhi shtetasve evropianë miliona euro, duke u premtuar investime në letra me vlerë dhe kriptovaluta.
SPAK i kërkon gjykatës respektive kalim për gjykim të çështjes penale në ngarkim të Jusel Micit dhe Mendim Domit, të akuzuar për “Mashtrimit kompjuterik” në dëm të disa personave, në bashkëpunim në formën e grupit të strukturuar kriminal, “Krijimit të grupit të strukturuar kriminal”, “Fshehjes së të ardhurave” dhe “Pastrimit të produkteve të veprës penale”. Ndërkohë, janë sekuestruar pasuri të paluajtshme dhe vlera monetare të gjetura në llogari bankare, që dyshohet se rrjedhin nga ky aktivitet i paligjshëm.
Hetimi ndaj Micit dhe Domit ka filluar bazuar në kërkesën për ndihmë të ndërsjelltë të Prokurorisë së Pizës në Itali, e cila po hetonte në kuadër të procedimit penal kundër të hetuarve Stefano Matteo Tonarelli, Gianmario Perico, Jusel Mici, etj, për veprat penale të “Mashtrimit në rrethana rënduese”, në formën e grupit të strukturuar kriminal. Sipas SPAK, të akuzuarit Mici dhe Domi janë organizatorë dhe pjesëtarë të grupit të strukturuar kriminal.
Mashtrimi “on line” lidhej me investime në letra me vlerë dhe kriptovaluta.
Po ashtu, janë përdorur shoqëritë fiktive Capitalcom Investment, Direct Coin Limited, Lead Secure Ltd, Finex Group Ltd, Futurus XOU, Luxor, Mm Consulting S.R.S.S. Shoqëri Scs Smart Coomunications Services S.R.L.S Estra dhe të tjera, për kalimin e vlerave monetare të mashtrimit.
Këto shoqëri janë përdorur për të hapur llogari rrjedhëse të huaja në Lituani, Britani e Madhe, Belgjikë, Luksemburg, Gjermani dhe Itali dhe duke menaxhuar faqe interneti që reklamonin aktivitetin. Gjithashtu janë përdorur edhe qëndra thirrje të llojit call-center, në Itali dhe Shqipëri, nëpërmjet të cilave kontaktoheshin viktimat, duke i bindur të bëheshin pjesë e programeve të rreme të investimit.
Sipas SPAK, autorët u propozonin viktimave të derdhnin shuma të konsiderueshme parash nëpërmjet transferimeve on line në llogaritë rrjedhëse të huaja të kompanive fiktive. Me marrjen e menjëhershme të këtyre shumave, ato zhdukeshin duke u konvertuar kryesisht në kriptovaluta. Nga aktet e adminsitruara gjatë hetimit penal, janë ngritur dyshime se numri i të dëmtuarve është shumë herë më i madh nga ata që kanë kryer kallëzim për këtë skemë mashtrimi. Duke iu referuar kallëzimeve, dëmi ekonomik i provuar në dëm të qytetarëve evropianë arrin në vlerën 3 milionë euro.
Pasi vlerat monetare përvetësoheshin, ka pasur një numër të madh veprimesh të transferimit të tyre në llogari të kompanive të tjera të shumta të regjistruara në Shqipëri, me qëllim fshehjen dhe mbulimin e origjinës së paligjshme. Gjithashtu, me këto para të fituara në mënyrë të paligjshme nga mashtrime, janë kryer transaksione të shumta, duke blerë pasuri të paluajtshme
SPAK thotë se ka arritur të identifikojë dhe sekuestrojë depozita në vlerën rreth 205 mijë euro, si dhe pasuri të paluajtshme, konkretisht tre apartamente në Tiranë dhe tetë ngastra toke të llojit arë, me sipërfaqe totale mbi 26 mijë m2. Sipas prokurorisë, dyshohet se në këtë aktivitet të kundërligjshëm janë të përfshirë dhe persona të tjerë, shqiptarë e të huaj, ndaj të cilëve po vijojnë hetimet.
