Edicioni i 19-të i Festivalit të Muzikës së Dhomës u realizua plotësisht në sallën modeste të Kon-katedrales “Shën Luçia” në lagjen historike të qytetit, e cila i ka hapur prej shumë vitesh dyert, për instrumentistët dhe muzikantët.
“Veprimtaria me tetë koncerte u zhvillua për të dytin vit radhazi në Kon-katedralen “Shën Luçia”, një mjedis shumë i mirë edhe për llojin e muzikës së përzgjedhur, tha për BIRN Nevila Kalaja, violiniste dhe drejtuese e këtij Festivali.
“Në krahasim me sallat e pakta që ka qyteti, më pëlqen salla e kishës, mjaft intime për spektatorët e pasionuar, që na ndjekin prej vitesh – shtoi ajo.
Në edicionin e radhës, që përfundoi të enjten morën pjesë 33 instrumentistë gjithsej, të ardhur nga nënte vende të Evropës.
Violinistja Kalaja nënvizon koncertin e Ansamblit të Muzikës së dhomës për të rinj, loja e të cilëve e kishte mbushur plot kishën “Shën Luçia”.
Salla e llogaritur për 100 dëgjues, ishte tejmbushur edhe me prindër e fëmijë, çka gjithsesi nuk e pengoi interpretimin e të rinjve artistë dhe dirigjentit të tyre nga Sllovenia.
Kon-katedrale “Shën Luçia”, megjithëse me një kapacitet të vogël ka mikpritur ndër vite mjaft interpretues shqiptarë dhe jo vetëm.
Sidoqoftë, ajo nuk e ka mbuluar dot nevojën që ka qyteti me 250 mijë banorë për mjedise të tjera për muzikë, letërsi dhe koncerte të çdo lloji.
Dirigjenti Petrika Afezolli ka shfrytëzuar disa herë kishën Domenikane në periferi të qytetit për koncertet e Orkestrës së Harqeve, kishë e cila ofron hapësira më të mëdha.
Në fillim të sezonit veror, dy koncerte të rëndësishme me muzikën e mjeshtrit Ennio Morricone dhe këngëtarit Majkëll Xhekson u organizuan në shëtitoren bregdetare, vetëm pak metra larg detit.
Sidoqoftë mungesa e mjediseve për koncerte publike ndjehet, veçanërisht në dimër.
Salla e teatrit “Aleksandër Moisiu” dhe ajo e Odeonit “Nikolin Xhoja” në të njëjtën godinë, i kanë hapur dyert më pak për koncerte instrumentale, çka nuk e anashkalon “varfërinë” e sallave artistike në qytetin bregdetar.
Gaetano Castello, një sipërmarrës italian, qytetar i Durrësit që nga viti 1992, i ka ndjekur me vëmendje koncertet e organizuara në qytet.
Ai kujton se veprimtaritë e para të Nevilës janë realizuar në galerinë veriore të amfiteatrit, gati 20 vjet më parë. Restaurimi i parë Muzeut arkeologjik në vitin 2014, mundësoi interpretimin e instrumentistëve në sallën kryesore, mes objekteve të antikitetit.
“Njëlloj e kam ndjekur veprimtarinë edhe në mjediset e Kon-katedrales “Shën Luçia”, stacioni i fundit i Festivalit ndërkombëtar të Muzikës së Dhomës – vlerëson për BIRN Gaetano Castello, sipas të cilit rikonstruksioni i Teatrit “Aleksandër Moisiu” që do të fillojë së shpejti, do ti drejtojë përsëri artistët koncertistë në salla të tjera alternative.
Që nga fillimi i sezonit veror, në arenën e amfiteatrit antik janë zhvilluar jo vetëm koncerte dhe shfaqje teatrale, por janë projektuar gjithashtu edhe filma dokumentarë.
Institucionet kanë gjetur një mënyrë për të “mbuluar” mungesën e hershme të një kinemaje në qytet.
Duke filluar që nga 4 korriku, çdo të enjte në amfiteatër janë projektuar filma dokumentarë, një veprimtari e organizuar nga Instituti Francez.
Në mungesë të një salle kinemaje në qytet, gjithçka deri në fillim të muajit shtator, është spostuar në arenën e monumentit.
Alban Ramohito, drejtor i Qendrës Kombëtare Muzeore tha për BIRN, se sheshi në qendër të monumentit antik ka shërbyer si hapësirë artistike që nga viti 2019, e më pas ka vijuar me disa ndërprerje, por gjatë sezonit turistik 2024 për shkak të pranisë masive së turistëve të huaj çdo javë janë zhvilluar 2-3 aktivitete të shumëllojshme.
Bashkëpunimet me Teatrin e Operas, si dhe me disa këngëtarë lirikë si Gëzim Myshketa apo Arlinda Morava e kanë kthyer amfiteatrin në një hapësirë të mirëfilltë koncertale, apo edhe në një kinema verore,” tha më tej drejtori Ramohito.
Në kishën “Shën Luçia” sapo ka përfunduar koncerti i Ansamblit të të Rinjve.
“Të rinjtë kanë fituar sigurinë e interpretimit në publik,” tha Nevila Kalaja.
“Jam e gëzuar, pasi gjatë koncerteve u interpretuan premierë absolute, dy vepra nga autorë sllovenë dhe një shqiptar.
Nga 33 pjesëmarrësit e Festivalit, më i riu është vetëm 14 vjeç, ndërsa më I moshuari, pianisti Bruno Canino, pas pak muajsh feston 89-vjetorin e lindjes – përfundon drejtuesja Nevila Kalaja.
