Rreth 23 mijë votues gëzojnë të drejtën e votës në bashkinë Himarë, por një pjesë e madhe e tyre janë emigrantë dhe në zgjedhjet vendore të vitit 2023, gati një në tre votues e hodhën morën pjesë në votime.
Në njësinë administrative Himarë ndodhen 18 qendra votimi dhe 12,152 zgjedhës në listë, në njësinë administrative Lukovë ndodhen 12 qendra votimi dhe 7,895 zgjedhës, ndërsa në njësinë administrative Horë-Vranisht ndodhen 6 qendra votimi me 2755 zgjedhës .
Kutitë e votimit do të qëndrojnë të hapura deri në orën 19:00 dhe më pas do të grumbullohen në Komisionin e Zonave të Administrimit Zgjedhor Nr.88 në qytetin e Himarës, ku do të fillojnë numërimi.
Kandidatët për kryebashkiak në Himarë janë Vangjel Tavo, nga Partia Socialiste dhe Petro Gjikuria, nga Partia Demokratike, i mbështetur nga PBDNJ dhe OMONIA.
Me profesion mjek, Tavo është zgjedhur disa herë deputet në Kuvendin e Shqipërisë si përfaqësues i Lëvizjes Socialiste për Integrim. Përpara se të kandidonte si kryebashkiak për bashkinë Himarë, ai mbajti për disa muaj postin e Prefektit të Vlorës. Ndërkohë rivali i tij Petro Gjikuria është një biznesmen shqiptaro-amerikan me origjinë nga Dhërmiu.
Zgjedhjet e pjesshme në Himarë mbahen pas arrestimit të Fredi Belerit, kandidatit të zgjedhur nga radhët e opozitës, i cili më vonë u dënua për blerje votash dhe i’u hoq mandati nga Komisioni Qendror i Zgjedhjeve.
Gjatë zgjedhjeve vendore të vitit 2023, 7661 votues morën pjesë në zgjedhje nga të cilët 3840 votuan për Fredi Belerin dhe 3821 për Jorgo Goron, me një diferencë të ngushtë prej 19 votash.
Në zgjedhjet e fundit, Partia Socialiste ka pasur një avantazh të qartë në njësinë administrative Horë-Vranisht, duke marrë 83.2% të votave.
Kjo njësi administrative tradicionalisht e majtë – pjesë e luginës së lumit të Vlorës, iu bashkua bashkisë së Himarës pas reformës administrative të vitit 2015, duke hapur debate për deformim të hartës zgjedhore, proces që në anglisht njihet si ‘gerrymandering’.
