Prokuroria e Posaçme kundër Korrupsionit dhe Krimit të Organizuar, SPAK njoftoi të enjten më 15 gusht konfiskimin e pasurive të të dënuarit për trafikim të narkotikëve, Alket Hatija, i njohur dhe si “Zotëria i drogës”.
Në vitin 2017, policia shqiptare arrestoi në Durrës Alket Hatinë, i shpallur në kërkim në Itali, ku dhe ishte dënuar me 20 vjet burg. Ai u lirua atëherë nga Gjykata e Durrësit mes debatesh të ashpra, ndërkohë që në shtator të vitit 2021, Gjykata e Lartë vendosi ta ekstradojë në Itali. në momentin e dhënies së vendimit nga Gjykata e Lartë, vendndodhja e Hatisë nuk dihej, por në gusht të vitit 2023 ai u ndalua në një hotel po në qytetin e Durrësit.
Në njoftim thuhet se Hatija është deklaruar fajtor në vitin 2010 nga ish-Gjykata e Shkallës së Parë për Krime të Rënda, për kryerjen e veprës penale “Trafikim i narkotikëve”, kryer në bashkëpunim, më shumë se një herë, që është lënë atëherë në fuqi dhe nga Apeli për Krime të Rënda.
Sipas SPAK, në gusht të vitit 2023, Gjykata e Posaçme e Shkallës së Parë ka vendosur konfiskimin dhe kalimin në favor të shtetit të dy trojeve me sipërfaqe totale 815 m2 dhe të një garazhi në lagjen “Plazh” në Durrës; një apartamenti në qytetin e Durrësit; një apartament tjetër në Kryemëdhenj të Kavajës, një autoveturë dhe 49% të kuotave të subjektit “Aquila Marble” sh.p.k., që i përkasin një familjari të tij, në cilësinë e personit të lidhur.
Hatija ka ushtruar ankim ndaj këtij vendimi, por Gjykata e Posaçme e Apelit e ka lënë në fuqi më datë 5 korrik, nga për rrjedhojë pasuritë e tij do të kalojnë në favor të shtetit.
