Vëzhguesit ndërkombëtarë i kërkuan Komisionerit Publik që të apelojë vendimin e Komisionit të Pavarur të Kualifikimit për konfirmimin në detyrë të prokurores së Vlorës Flora Çela. Vëzhguesit thonë në rekomandim se shkeljet e gjetura në kriterin e profesionalizmit nuk mund të korrigjoheshin me rishkollim në Shkollën e Magjistraturës.
“Prokurorja Çela duhet të shkarkohet nga detyra për shkak të mangësive profesionale në disa raste, të cilat nuk mund të korrigjohen me ndjekjen e Shkollës së Magjistraturës. Shkarkimi kërkohet pasi rivlerësimi i punës së saj zbuloi mungesë njohurish, aftësishë, gjykimi dhe zotësie”, thuhet në rekomandim.
Komisioni i Pavarur i Kualifikimit, KPK pati vendosur në tetor 2023 pezullimin e Çelës nga detyra me qëllim trajnimin e saj pranë Shkollës së Magjistraturës. Një vit pas këtij trajnimi KPK, më 23 shtator 2024, arsyetoi se Çela duhej të konfirmohej në detyrë.
Procesi i vetingut për prokuroren Çela u krye nga trupa e KPK e kryesuar nga Lulzim Hamitaj, me relatore Brundilda Bekteshin dhe anëtare Etleda Çiftjan.
Por ky vendim i KPK-së është sipas ONM i kontestueshëm. Vëzhguesit thonë se vetëm në hetimin e një çështje të trafikut të narkotikëve, që përfshinte kapjen e mbi 15.5 ton kanabis në verë të vitit 2017, Çela kishte bërë 15 shkelje të rënda. ONM thotë se hetimet e çështjes u vonuan, ajo nuk u regjistrua si vepër e krimit të organizuar, nuk iu transferua siç parashikohej në ligj krikmeve të rënda dhe në fund u dështua të gjendeshin pronarët e sasisë së madhe të kanabisit.
Sipas ONM-së në morinë e shkeljeve ishte mos shqyrtimi n ëkohë i pamjeve në një regjistrues i cili më pas u gjet i fshirë, mos marrja në konsideratë e të dhënave nga policia dhe deri te mosverifikimi i shenjave të gishtave të gjetura në shtëpinë ku u kap droga.
ONM thotë se shkeljet e Çelës dhe qëndrimet e mbajtura prej saj në seancë dëgjimore, shmangia e përgjigjeve e të ngjashme, ishin aryse të mjaftueshme për të rishqyrtuar rastin në Kolegjin e Posaçëm të Apelimit.
Sipas vëzhguesve në rastin në fjalë shkarkimi është i nevojshëm. “Ndër të tjera, ky model punë është kaq i dobët saqë rrezikon dhe dhunon të drejtat e qytetarëve”, thuhet në rekomandim.
