Komisioni i Pavarur i Kualifikimit, KPK vendosi të martën më 22 tetor të konfirmojë në detyrë ndihmësen ligjore Orela Troplini, pas një seance të shkurtër dëgjimore, ku nuk u evidentuan probleme domethënëse në kriterin e pasurisë. Për figurën dhe profesionalizmin ajo u vlerësua pozitivisht.
Vendimi për konfirmimin e Troplinit u mor nga trupa e KPK e kryesuar nga Roland Ilia, me relatore Genta Tafa Bungo dhe anëtare Xhensila Pinen. Në cilësinë e vëzhguesit ndërkombëtar ishte i pranishëm Francesco Chiardi.
Orela Troplini e ka filluar detyrën si ndihmëse ligjore në vitin 2015 pranë Gjykatës Administrative të Shkallës së Parë Durrës. Ajo tha në seancë se aktualisht punon në të njëjtën detyrë panë Gjykatës së Apelit të Juridiksionit të Përgjithshëm.
Relatorja Bungo evidentoi në seancë se bashkëshorti i subjektit i cili është ndarë nga jeta në vitin 2019, ka ushtruar aktivitet privat së bashku me familjen e tij prej vitit 1995.
Megjithëse u konstatua pamundësi për blerjen e një apartamenti në vitin 2005 me burim të ardhurat nga aktiviteti familjes së bashkëshortit të subjektit, Komisioni nuk i ka kaluar barrë prove për arsye se kjo pasuri është krijuar kohë para fillimit të detyrës.
E njëjta situatë u relatua dhe për blerjen e një anijeje nga bashkëshorti i ndjerë në vitin 2009 kundrejt shumës 30 mijë euro, për të cilën subjektit dhe në këtë rast i janë kërkuar vetëm shpjegime.
Sipas Komisionit, nuk janë gjetur probleme për blerjen e një apartamenti në vitin 2020 me burim të ardhurat nga shitja e anijes, si dhe për një hua të dhënë vëllait të bashkëshortit.
Nga analiza financiare e përgjithshme paraprake për periudhën e ushtrimit të detyrës, është konstatuar pamundësi totale në shumën 138 mijë lekë.
Subjekti dha shpjegime të përmbledhura duke shprehur dakordësi për konstatimet e kërkoi konfirmimin në detyrë.
Rreth gjysmë ore pas përfundimit të seancës, Komisioni shpalli vendimin e konfirmimit në detyrë të ndihmëses ligjore, Orela Troplini, të marrë në mënyrë unanime.
