Ish-presidenti dhe kryetari i Partisë së Lirisë, Ilir Meta, ishte i pranishëm në seancën e së mërkurës më 23 tetor, për marrjen në pyetje dhe verifikimin e kushteve dhe kritereve të zbatimit të masës së sigurimit personal “arrest në burg”, të caktuar ndaj tij nga Gjykata e Posaçme e Shkallës së Parë, tre ditë më parë. Ai mbërriti në mëngjes në gjykatë nga dhomat e paraburgimit, ku gjendet prej të hënës kur u arrestua për korrupsion, pastrim të parave dhe mosdeklarim e fshehje të pasurive. Metës iu desh të qëndronte në gjykatë brenda kafazit të xhamtë prej orës 09:30, kur filloi seanca, deri në orën 18:00 kur u shpall vendimi. Gjatë kësaj kohe pati një pushim prej tre orësh për t’u dhënë kohë avokatëve të të proceduarve të njiheshin me aktet e paraqitura nga prokuroria. Seanca u zhvillua me dyer të mbyllura për arsye të ruajtjes së sekretit hetimor.
Bashkëshortja e tij, Monika Kryemadhi, u paraqit në orar dhe ishte e pranishme në seancën që filloi në orën 09:30. E veshur me të zeza, ajo mbajti qëndrime ndaj pyetjeve të gazetarëve lidhur me veprat penale dhe episodet për të cilat po e heton Prokuroria e Posaçme, SPAK. E pyetur nga gazetarët për shpenzimet për veshjet e saj në një ditë në San Marino, ajo u shpreh se edhe në atë moment mbante veshur një xhaketë të markës “Michael Kors”. Kryemadhi këmbënguli se kishte deklaruar gjithçka dhe i konsideroi akuzat politike dhe të pabazuara në prova. Po ashtu, e cilësoi prokurorinë si të kapur nga kryeministri Edi Rama.
Kryemadhi deklaroi gjithashtu se kishte udhëzuar përfaqësuesin ligjor të Metës, avokatin Genc Gjokutaj, që të kërkonte “arrest në burg” për të dhe “detyrim paraqitje” për Ilir Metën.
Avokati Genc Gjokutaj tha se arrestimi i Metës është kryer për shkak se ai është lideri i dytë opozitar. Sipas tij, arrestimi i Metës është një përpjekje për të izoluar opozitën.
Pas shqyrtimit të materialeve të prokurorisë dhe dëgjimit të pretendimeve të të hetuarve dhe mbrojtësve të tyre, gjyqtari Erjon Çela vendosi vazhdimin e masës së sigurimit personal “arrest në burg” ndaj ish-presidentit dhe kryetarit të Partisë së Lirisë, Ilir Meta, për korrupsion pasiv në tre raste, nga të cilat dy herë në bashkëpunim, për pastrim parash dhe mosdeklarim e fshehje të pasurive.
Gjykata la në fuqi masën “detyrim për t’u paraqitur në policinë gjyqësore” të caktuar ndaj bashkëshortes së Metës, deputetes Monika Kryemadhi, për të njëjtat vepra penale, si dhe ndaj të hetuarës Ema Çoku, për pastrim parash. Ndërkohë, u zëvendësua masa e sigurimit personal ndaj Piro Xhixhos, i hetuar për korrupsion pasiv, nga “arrest në shtëpi” në “detyrim për t’u paraqitur në policinë gjyqësore”.
Të tre të hetuarit nën masën e sigurimit “detyrim paraqitje” urdhërohen të paraqiten një herë në muaj në zyrat e Policisë Gjyqësore të SPAK.
SPAK e akuzon Metën për ndikime korruptive dhe përfitime monetare në çështjen CEZ-DIA, në një marrëveshje interkoneksioni, si dhe për një marrëdhënie të dyshuar korruptive për ndryshimin e një ligji në favor të biznesmenit Samir Mane. Sipas njoftimit të shpërndarë nga SPAK, akuza të ngjashme rëndojnë edhe mbi deputeten Monika Kryemadhi, e cila është bashkëshortja dhe bashkëpunëtorja e Metës për dekada, por tashmë ata ndodhen në proces divorci.
Ish-kreu i AKEP ndodhet në detyrim paraqitje për veprën penale të korrupsionit pasiv. Gjithashtu, Ema Çoku, një financuese e LSI-së, ndodhet nën masën e detyrimit për t’u paraqitur për veprën penale të pastrimit të parave.
