Një grup protestuesish, të cilët mbanin disa harta të Shqipërisë të ngjyrosura me njolla të kuqe për të simbolizuar gjakun e derdhur të viktimave nga atentatet kriminale të ndodhura së fundmi, ngritën zërin të mërkurën pasdite pranë Ministrisë së Brendshme kundër akteve mafioze dhe kriminale që po kryhen rishtazi në hapësirat publike.
“Atentatet mafioze në rrugë, pazar, sheshe, në mes të ditës dhe në injorim të plotë të organeve të rendit po e bëjnë gjithnjë e më të pasigurt jetën e secilit prej nesh,” shkruhej në një fletëpalosje t ë shpërndarë nga protestuesit.
“Ne besojmë se shumica e shoqërisë përbëhet nga njerëz të ndershëm, që jetojnë me punën e tyre. Ndaj i themi JO çdo lloj alternative kriminale në familje, shoqëri dhe politikë,” shtohej në fletëpalosje.
Sipas protestuesve, deklarata e Kryeministrit Edi Rama se “bandat mund të hanë kokat e njëri-tjetrit” i ka hapur rrugë vrasjes së 14 individëve të pafajshëm, si pasojë e atentateve mafioze të kryera nga grupet kriminale.
