Gjykata e Posaçme e Apelit për Korrupsionin dhe Krimin e Organizuar e ashpërsoi dënimin ndaj ish-ministrit të Mjedisit, Lefter Koka për incineratorin e Elbasanit dhe konfiskoi më shumë pasuri nga sa kishte disponuar shkalla e parë. Po ashtu, ndryshe nga Gjykata e Posaçme e Shkallës së Parë që nuk gjeti përgjegjësi penale në veprimet e ish-deputetit socialist, Alqi Bllako, në cilësinë e sekrrtarit të përgjithshëm në Ministrinë e Mjedisit, Apeli e deklaroi atë fajtor për shpërdorim detyre.
Trupi gjykues Apelit të Posaçëm, i kryesuar nga gjyqtarja Iliriana Olldashi dhe me anëtarë gjyqtarët Saida Dollani dhe Engert Pëllumbi shpalli të premten më 8 nëntor vendimin e formës së prerë për 11 të pandehurit për aferën e incineratorit të Elbasanit, ish-ministrin Lefter Koka; ish-deputetin socialist, Alqi Bllako; Pëllumb Abeshin, Serafin Papën, Jonida Zeqon, Bardhyl Çabirin, Mirel Mërtirin, Stela Gugalljan, Klodian Zoton, Shoqërinë “Integrated Technology Services”shpk dhe Shoqërinë “Albtek Energy” shpk.
Ish-ministri i Mjedisit, Lefter Koka ishte dënuar më 5 tetor 2023 me 5 vjet e 8 muaj burg për incineratorin e Elbasanit, por Apeli i shtoi edhe 4 vjet burg për akuzën e shpërdorimit të detyrës. Në bashkim të dënimeve dhe të aplikimit të gjykimit të shkurtuar, Koka do të vuajë 6 vjet e 8 muaj burg.
Bllako ishte shpallur i pafajshëm në shkallë të parë, por Apeli vendosi ta dënojë atë me 4 vjet burg për akuzën e shpërdorimit të detyrës. Me reduktimin e dënimit nga gjykimi i shkurtuar, Bllako do të vuajë 2 vjet e 8 muaj burg për incineratorin e Elbasanit. Atij iu hoq gjithashtu e drejta për të ushtruar funksione publike për pesë vjet. Apeli la në fuqi vendimet e mëparshme për të dënuarit e tjerë.
Gjykata e Posaçme e Apelit u tregua më e ashpër edhe lidhur me pasuritë. U vendos konfiskimi dhe kalimi në favor të shtetit i 88.19 % të aksioneve në zotërim të Kokës në kantinën e pijeve; i një shoqërie në Durrës; të tre njësive; një shoqërie tregtare së bashku me pasuritë e paluajtshme, tetë apartamente dhe një truall me ndërtesë.
Skandali i incineratorëve nisi në vitin 2014 me një vendim të qeverisë për të shpallur një emergjencë mjedisiore, si justifikim për të dhënë koncesionin e incineratorit të Elbasanit. I njëjti grup kompanish mori më pas koncesion për incineratorin e Fierit dhe atë të Tiranës. Dy dyzina me zyrtarë dhe biznesmenë janë arrestuar ose janë shpallur në kërkim për çështjen, përfshirë biznesmenët Mirel Mërtiri, Klodian Zoto dhe Stela Gugallja.
