Prokuroria e Korçës njoftoi të premten më 8 nëntor regjistrimin e procedimit penal ndaj një punonjësi të Bashkisë Pogradec për kanosjen e gazetarit të Report TV, Armand Braho. Sipas prokurorisë, hetimi ka filluar për veprën penale “kanosje për shkak të detyrës”.
“Procedimi penal u regjistrua kryesisht pasi shtetasi A.B, me detyrë gazetar pranë ‘Report TV’, denoncoi publikisht se është kërcënuar nga një punonjës në Bashkinë e Pogradecit”, citohet në njoftimin e prokurorisë.
Në një reagim në llogarinë e tij në Facebook të mërkurën, Braho bëri me dije se ishte ofenduar dhe kërcënuar nga ana e shoferit të Bashkisë së Pogradecit, Ylli Blacëri, gjatë një aktiviteti të zhvilluar pranë kësaj bashkie. “Ky akt është ndërmarrë nga personi në fjalë si një mënyrë për të më penguar dhe presionuar për shkak të detyrës sime,” shkroi Braho dhe shtoi se kishte bërë kallëzim penal në Komisariatin e Pogrdecit.
Lidhur me këtë ngjarje, reagoi të mërkurën Asociacioni i Gazetarëve të Shqipërisë, AGSH, duke dënuar aktin dhe mbështetur gazetarin Armand Braho. “Roli i gazetarëve që raportojnë në lokalitete është jetik për një peizazh mediatik të shëndetshëm,” shkroi AGSH.
