Gjykata e Posaçme e Apelit për Korrupsionin dhe Krimin e Organizuar shpalli të hënën më 18 nëntor vendimin për anëtarin e Kolegjit të Posaçëm të Apelimit, Ardian Hajdari, duke e deklaruar atë të fajshëm për akuzën e fshehjes së të ardhurave dhe të pasurisë.
Hajdari u dënua nga Gjykata e Posaçme e Shkallës së Parë më 24 janar me 1 vit burg për këto akuza, por dënimi u pezullua dhe u konvertua në 2 vjet shërbim prove.
Trupi gjykues i Apelit të Posaçëm, i kryesuar nga gjyqtari Engert Pëllumbi dhe anëtarë Daniela Shirka e Florjan Kalaja, megjithëse vendosën prishjen e vendimit dhe lehtësimin e masave ndëshkuese, e cilësuan atë fajtor për fshehjen e të ardhurave e të pasurisë. Në përfundim, Apeli e dënoi atë me 6 muaj burgim dhe e pezulloi ekzekutimin duke e vendosur në periudhë prove për 1 vit.
Prej 7 shkurtit 2022, Hajdari është pezulluar nga detyra në KPA, pasi u mor i pandehur nga nga SPAK. Pas vendimmarrjes së formës prerë, KPA duhet të marrë vendim për vijimësinë e pozicionit të tij.
Më 24 qershor 2020, Hajdari u kallëzua penalisht në SPAK me pretendimin se kishte gënjyer në aplikimin për t’u zgjedhur anëtar i KPA-së përmes falsifikimit të dokumenteve. Kallëzimi i referohej deklarimit të tij se punonte prej 17 vitesh si avokat.
SPAK e akuzoi Hajdarin se nuk kishte deklaruar të ardhurat nga acokatia, kur kishte aplikuar për vendin e punës si anëtar i KPA.
Sipas prokurorisë, mosdeklarimi i të ardhurave nga aktiviteti i avokatisë nuk është harresë, por është një fshehje e mirëfilltë e kryer për disa vite me radhë. Sipas verifikimet e kryera ka rezultuar se Hajdari ka përfaqësuar në cilësinë e avokatit dhjetëra çështje për disa vite, por nuk i ka deklaruar në tatime të ardhurat e fituara.
Hajdari ka këmbëngulur në pafajësi.
