Gjykata e Posaçme e Shkallës së Parë vendosi të mërkurën më 27 nëntor deklarimin fajtor të ish-prefektit të Kukësit, Granit Gjana, për abuzime me tenderat në kohën kur ai në cilësinë e ish-nënkryetarit të Bashkisë Kukës, kishte marrë detyrat e eprorit të tij, Safet Gjici, pas dorëheqjes së këtij të fundit si pasojë e shpërdorimit të detyrës, gjatë një afere seksuale në zyrën e tij.
Ashtu si dhe kërkoi prokuroria gjatë konkluzioneve përfundimtare, trupi gjykues i përbërë nga gjyqtarët Etleva Deda, Erjon Çela dhe Flojera Davidhi, vendosën ta dënojnë Gjanën për veprën penale “Shkelja e barazisë së pjesëmarrësve në tendera apo ankande publike” në dy raste, më një masë prej 1 viti e 6 muaj heqje lirie, që në aplikim të gjykimit të shkurtuar u reduktua në 1 vit burgim. Po ashtu, u pezullua ekzekutimi i dënimin dhe i pandehuri u vendos në shërbim prove për një periudhë prej dy vitesh, me kusht që gjatë kohës së provës të mos kryejë vepër tjetër penale.
Gjykata caktoi dhe dënim plotësues, duke i hequr të drejtën për të ushtruar funksione publike për 5 vjet.
Gjana, u akuzua se kishte shkelur barazinë në dy tendera duke mos kryer detyrat funksionale, që kanë sjellë pengimin e një kompanie për t’u kualifikuar në procedurat e një tenderi për blerje karburanti.
