Prokuroria e Posaçme kundër Korrupsionit dhe Krimit të Organizuar, SPAK njoftoi të enjten më 12 dhjetor rezultatet e një hetimi ndaj një tregu të paligjshëm kibernetik, ku shiteshin ndër të tjera të dhëna personale dhe materiale për kryerjen e krimeve kibernetike.
Në pranga janë vendosur tre administratorët e tregut të paligjshëm kibernetik, njëri prej të cilëve shtetas kosovar me lejeqëndrim dhe banim në Shqipëri.
Sipas SPAK, prej shkurtit 2016 në platformën e quajtur Rydox janë kryer mbi 7600 shitje të informacionit, që kanë gjeneruar të paktën 230 mijë dollarë të ardhura. Kjo platformë ka ofruar mbi 321 mijë e 372 produkte të krimit kibernetik për një bazë përdoruesish prej 18 mijë individësh. Këtu përfshihen informacione personale të vjedhura të identifikueshme si emrat, adresat dhe numrat e sigurimeve shoqërore, informacionin e kartave të kreditit dhe kredencialet e hyrjes të mijëra personave që banonin në Shtetet e Bashkuara të Amerikës.
Faqja e internetit Rydox funksiononte sipas SPAK si një treg i paligjshëm i dedikuar për shitjen e informacionit personal të vjedhur; shitjen e kredencialeve të aksesit të pajisjeve të vjedhura; si dhe për shitjen e mjeteve dhe materialeve për kryerjen e krimeve kibernetike, duke përfshirë tutoriale dhe mjete për spam.
Gjatë kontrolleve të ushtruara janë sekuestruar 1 njësi kompjuterike dhe 6 laptopë; 5 celularë dhe pajisje të tjera memorizuese; si dhe dokumente e asete monetare në kriptomonedha.
Po ashtu, autoritetet amerikane kanë sekuestruar domenin ëëë.Rydox.cc, duke parandaluar përdorimin e mëtejshëm të kësaj platforme për shitblerje të paligjshme. Në njoftim sqarohet se vizitorët e faqes tashmë do të shohin një baner që njofton sekuestrimin nga autoritetet federale, në bashkëpunim me SPAK dhe partnerët ndërkombëtarë.
Për mundësimin e operacionit kanë bashkëpunuar ndër të tjera dhe FBI, Policia Mbretërore e Malajzisë dhe policia e prokuroria e Kosovës.
Procedimi penal është regjistruar këtë vit për veprat penale të “Mashtrimit kompjuterik” dhe “Pjesëmarrjes në grup të strukturuar kriminal”. SPAK thotë se hetimet vazhdojnë për përcaktimin e plotë të përgjegjësisë penale të të dyshuarve dhe përfundimin e hetimeve për të gjithë zinxhirin kriminal.
