Një muaj pas vrasjes tragjike të 14 vjecarit Martin Cani nga bashkëmoshatari i tij, aktivistët e grupimit “Prindërit për Arsim Cilësor” zhvilluan protestën e radhës në kërkim të përgjegjësisë institucionale dhe drejtësisë.
Dhjetra qytetarë marshuan prej shkollës “Fan Noli” drejt Ministrisë së Arsimit për të pestën herë radhazi, me pankartën “Institucionet e Papërgjegjshme Vrasin” dhe nën thirrjet për drejtësi.
Qytetarët akuzuan institucionet e arsimit për mosveprim, dhe policinë e shtetit për moszbardhje të plotë të ngjarjes. Protestës iu bashkuan edhe prindërit e Martinit, Angel dhe Florina Cani, të cilët të përlotur dhe në dhimbje kërkuan rishtazi dorëheqjen e atyre që nuk siguruan mbrojtjen e djalit të tyre.
“Dua dorëheqjen e Ministres, drejtorisë së shkollës, mësuesja kujdestare që nuk më telefonoi. Ministrja nuk më ngushëlloi kurrë, por qeshte me ato të tjerat në parlament për zemrën e djalit tim që u ther,” tha nëna e Martinit me zërin që i dridhej.
“Të japin të gjithë dorëheqjen, ata që nuk e mbrojtën Martinin. Nga dera e shkollës deri te Ministria, të dorëhiqen, të na qetësohet pak shpirti,” shtoi ajo.
Nëna e Martinit, një ish-arsimtare tregoi për sakrificat e saj në rritjen dhe edukimin e fëmijëve.
“U bënë 30 ditë që nuk e shoh më Martinin tim. Ata ma morën. Por ju duhet të luftoni që të mbroni ‘Martinat’ tuaj”, bëri ajo thirrje për sigurinë e fëmijëve të tjerë.
Prindërit e Martin Canit iu drejtuan gjithashtu të martën ambasadës së Shteteve të Bashkuara në Tiranë me një letër me anë të të cilës kërkuan monitorimin e veprimeve të insituticioneve shqiptare lidhur me këtë ngjarje, duke u shprehur se po përjetojnë një vrasje të dytë të djalit nga papërgjegjshmëria e instancave shtetërore.
Martin Cani u vra në nëntor nga goditjet e thikës së bashkëmoshatarit të tij gjatë një konflikti në dalje të shkollës “Fan Noli” në Tiranë, teksa gjatë përleshjes mbeti i plagosur edhe miku i tij Luisi. Autori i vrasjes u arrestua nga policia disa ditë pasi u mjekua në një spital privat të Tiranës, për disa plagë me thikë që u raportuan se kishte marrë pas konfliktit.
