Prokuroria e Posaçme, SPAK, kërkoi të mërkurën më 5 shkurt deklarimin fajtor të kryetarit të Bashkisë së Devollit, Eduard Duro dhe katër vartësve të tij, të akuzuar për shpërdorim detyre në dhënien e një lejeje dhe autorizimi një shoqërie në kundërshtim me ligjin, për stacionin e shitjes së karburantit në Devoll. Për katër të pandehurit, Eduard Duro, Astrit Seferkolli, Gazmend Haxhija dhe Gazmend Mali, në aplikim të gjykimit të shkurtuar u kërkua dënimi përfundimtar me 1 vit burg për secilin. Ndaj ish-administratores së njësisë Qendër Bilisht, Vojsava Bregu, u kërkua dënimi me 8 muaj burg.
Megjithatë, SPAK vlerësoi të kërkojë pezullimin e dënimit për secilin e të pandehurve, duke i vendosur ata në shërbim prove. Prokuroria kërkoi dhe caktimin e dënimit plotësues, për heqjen e të drejtës të pandehurve për të ushtruar funksione publike, për një periudhë 3-vjeçare.
Nga hetimet e SPAK, rezultoi se kryebashkiaku socialist Eduard Duro, në bashkëpunim me zyrtarët e Sektorit të të Ardhurave dhe Liçencimit në Bashkinë Devoll, Gazmend Haxhija dhe Gazmend Malo dhe sekretarin e Përgjithshëm të Bashkisë Devoll, Astrit Seferkolli, si dhe të pandehurën tjetër, Vojsava Bregu, pajisën shoqërinë tregtare “Genci Petrol” sh.p.k me autorizim për tregtimin me pakicë të karburantit. Sipas prokurorisë, ky autorizim është dhënë në kundërshtim me ligjin, pasi në vitin 2019 Inspektoriati Kombëtar i Mbrojtjes së Territorit kishte vendosur prishjen e pikës së karburantit.
Seanca u shty për t’u dhënë kohë të pandehurve të përgatisin mbrojtjen e tyre.
