Gjykata e Posaçme e Shkallës së Parë i shpalli të pafajshëm kryetarin e Bashkisë së Devollit, Eduard Duro dhe katër vartësit e tij, të akuzuar nga SPAK për shpërdorim detyre në dhënien e një lejeje dhe autorizimi një shoqërie, për stacionin e shitjes së karburantit në Devoll.
Gjatë konkluzioneve përfundimtare më 5 shkurt, SPAK kërkoi dënimin përfundimtar me nga 1 vit burg për katër të pandehurit Eduard Duro, Astrit Seferkolli, Gazmend Haxhija dhe Gazmend Mali. Ndaj ish-administratores së njësisë Qendër Bilisht, Vojsava Bregu, u kërkua dënimi me 8 muaj burg. Ndërkohë, SPAK kërkoi pezullimin e dënimit për secilin e të pandehurve, duke i vendosur ata në shërbim prove. Prokuroria kërkoi dhe caktimin e dënimit plotësues, për heqjen e të drejtës të pandehurve për të ushtruar funksione publike, për një periudhë 3-vjeçare.
Pas paraqitjes së konkluzioneve nga ana e mbrojtjes, gjyqtari i çështjes Bib Ndreca vendosi t’i deklarojë të pafajshëm të pesë të pandehurit.
Gjatë shqyrtimit gjyqësor, SPAK pretendoi se Duron në bashkëpunim me vartësit e tij, pajisën shoqërinë tregtare “Genci Petrol” sh.p.k me autorizim për tregtimin me pakicë të karburantit. Sipas prokurorisë, ky autorizim është dhënë në kundërshtim me ligjin, pasi në vitin 2019 Inspektoriati Kombëtar i Mbrojtjes së Territorit kishte vendosur prishjen e pikës së karburantit.
