“Roli specifik i Strukturës së Posaçme kundër Korrupsionit dhe Krimit të Organizuar (SPAK) dhe pavarësia e saj në hetimin, ndjekjen penale dhe gjykimin e rasteve komplekse të korrupsionit, pa asnjë përpjekje për ndërhyrje politike apo presion të padrejtë, janë me rëndësi thelbësore për konsolidimin e shtetit të së drejtës në Shqipëri,” i tha BIRN të mërkurën një zëdhënës i Komisionit Evropian.
Në një përgjigje me shkrim të përcjellë nga zyra e delegacionit të BE-së në Tiranë thuhet më tej se “po ndjekim nga afër zhvillimet e fundit në lidhje me hetimin ndaj kryetarit të Bashkisë së Tiranës”, duke shtuar se BE nuk komenton mbi procedurat gjyqësore në vazhdim.
Komisioni Europian thekson se reforma në sektorin e drejtësisë dhe forcimi i shtetit të së drejtës në Shqipëri janë elementë kyç në procesin e anëtarësimit në Bashkimin Evropian dhe se në këtë drejtim shihen dhe përpjekjet për konsolidim të standardeve të drejtësisë.
“BE-ja mbetet e përkushtuar maksimalisht për të mbështetur përpjekjet e Shqipërisë në ndjekjen e këtyre reformave dhe për ta ndihmuar vendin të konsolidojë efikasitetin, pavarësinë, llogaridhënien dhe profesionalizmin e institucioneve të saj, si dhe përputhshmërinë e tyre me standardet e BE-së, si në sektorin e zbatimit të ligjit ashtu edhe në atë të drejtësisë”- përfundon reagimi i zëdhënësit të Komisionit Europian.
Më herët të mërkurën, organet drejtuese të drejtësisë reaguan ndaj sulmeve të kryeministrit.
Në dy deklarata të veçanta, Këshilli i Lartë Gjyqësor dhe Këshilli i Lartë i Prokurorisë kërkuan nga aktorët politikë që të mos ushtrojnë trysni dhe presion që cënon pavarësinë e këtyre organeve.
Kryebashkiaku Veliaj u arrestua të hënën, pasi Gjykata e Posaçme firmosi masën e arrestit me burg të kërkuar më parë nga SPAK për vepra penale të korrupsionit i kryer në bashkëpunim. Ai akuzohet se së bashku me bashkëshorten, Ajola Xoxa, kanë krijuar dhe vënë në funksionim një mekanizëm të ngjashëm me atë të dosjes 5D, me qëllim përfitimin e paligjshëm të fondeve publike që rridhnin nga Bashkia e Tiranës, një skemë kjo e vërtetuar sipas SPAK në nëntë raste.
Kryeministri Rama bëri disa dalje dhe reagime publike kundër vendimeve të drejtësisë duke e cilësuar arrestimin e tij të padrejtë dhe ‘pa gjyq’ dhe atakoi prokurorët dhe gjyqtarët e çështjes duke hedhur aludime për pavarësinë e tyre politike.
Rama përdori termin “kamikazë” politikë duke folur për gjyqtarët e GJKKO-së të mërkurën, ndërsa akuzoi prokurorët e SPAK se nuk kishin ndjekur standardet ligjore gjatë hetimeve dhe marrjes në pyetje të personave të përfshirë në dosjen “Veliaj”.
