Prokuroria e Posaçme Kundër Korrupsionit dhe Krimit të Organizuar, SPAK njoftoi të enjten më 20 mars përfundimin e hetimeve ndaj deputetit të Partisë Demokratike, Qani Xhafa, i akuzuar për veprën penale “drejtim i automjeteve në mënyrë të parregullt”. Po ashtu, i është kërkuar gjykatës kalimi i çështjes për gjykim.
Në njoftim sqarohet se nga hetimet ka rezultuar se deputeti Qani Xhafa, më datë 11 mars 2023, ka qenë duke drejtuar automjetin në gjendje të dehur në bulevardin “Qemal Stafa” në qytetin e Elbasanit dhe ka humbur kontrollin, duke dalë nga rruga e duke u përplasur me një shtyllë të ndriçimit rrugor. Prej aksidentit janë shkaktuar dëme të lehta materiale.
SPAK vëren se i pandehuri Qani Xhafa ushtron funksionin e deputetit në Kuvendin e Shqipërisë prej datës 19 maj të vitit 2023.
