Prokuroria e Posaçme, SPAK paraqiti të mërkurën më 23 prill konkluzionet përfundimtare ndaj katër prej tetë zyrtarëve të Bashkisë së Tiranës që akuzohen se lehtësuan një skemë korrupsioni për të dërguar tenderat te kompania 5D, që sipas SPAK zotërohet “de facto” nga ish-drejtorët Redi Molla dhe Mariglen Qato.
Prokurori Klodian Braho kërkoi deklarimin fajtor për veprën penale “Shkelja e barazisë së pjesëmarrësve në tendera apo ankande publike” të katër të pandehurve, titullares së Klubit Sportiv Tirana, Deborah Keçi, si dhe të tre anëtarëve të Komisionit të Vlerësimit të Ofertave, Teuta Guri, Jetjon Mera dhe Rejnaldo Gjerazi. Vepra penale për të cilën akuzohen të pandehurit parashikon burgim deri në 3 vjet.
Braho kërkoi dënimin e të pandehurës Deborah Keçi me një vit burgim dhe në aplikim të gjykimit të shkurtuar, 8 muaj heqje lirie. Braho kërkoi pezullimin e ekzekutimit të vendimit dhe vendosjen e Keçit në shërbim prove për dy vjet.
Për tre të pandehurit e tjerë u kërkua dënimi me nga 9 muaj burgim secili dhe në aplikim të gjykimit të shkurtuar, nga 6 muaj heqje lirie. Edhe për këta të pandehur, Braho kërkoi pezullimin e ekzekutimit të vendimit dhe vendosjen në shërbim prove për një periudhë dy vjeçare. Braho sqaroi se në kërkimet e masave të dënimit, kishte konsideruar dhe vlerën e vogël të tenderit, në shumën 3 milionë lekë.
Përfaqësuesit ligjorë të të pandehurve kërkuan kohë për përgatitjen e konkluzioneve përfundimtare dhe seanca u shty për më datë 8 maj, në orën 12:00.
Sipas SPAK, nga hetimet e kryera është provuar fakti se e pandehura Deborah Keçi në cilësinë e titullarit të autoritetit kontraktor, Klubi Sportiv Tirana, institucion në varësi të Bashkisë Tiranë, në bashkëpunim me të pandehurit Teuta Guri, Jetjon Mera dhe Rejnaldo Gjerazi, në cilësinë e anëtarëve të KVO kanë krijuar për operatorin ekonomik “5D Konstruksion” sh.p.k avantazhe dhe privilegje të padrejta në procedurën e prokurimit me objekt rikonstruksionin e palestrës së mundjes, tender i zhvilluar në dhjetor të vitit 2020.
Keçi akuzohet se është dakortësuar me përfaqësuesin e operatorit ekonomik “V.A.S Konstruksion” sh.p.k për ta shpallur fitues të procedurës së prokurimit që në fazën e përgatitjes së dokumenteve, ende pa u shpallur procedura. Ndërsa tre të pandehurit e tjerë, Teuta Guri, Jetjon Mera dhe Rejnaldo Gjerazi, në cilësinë e anëtarit të KVO, akuzohen se nuk kanë ushtruar detyrën në përputhje me ligjin, përsa i përket vlerësimit dhe klasifikimit të ofertave, por kanë vlerësuar dhe klasifikuar në kundërshtim me rregullat e prokurimit publik operatorin ekonomik “5D Konstruksion” sh.p.k, që ka qenë i paracaktuar për tu shpallur fitues nga e pandehura Deborah Keçi.
Sipas SPAK, kompania e cila kontrollohej nga Qato dhe Molla është 5D Konstruksion, e cila në QKB është regjistruar në pronësinë e Nestor Muhametllarit. Kompania 5D Konstruksion u themelua në vitin 2016 me emrin Igor Elektrik dhe e ndryshoi më pas emrin në vitin 2019 në V.A.S. Konstruksion dhe në vitin 2021 në 5D Konstruksion.
