Një fadromist është zënë poshtë një masivi dheu mesditën e të shtunës, ndërsa punonte me mjetin e tij në gërryerjen e një rezervuari në afërsi të fabrikës së pasurimit të Kromit në Klos.
Ngjarja e rëndë ndodhi në vendin e quajtur qafa e Burrelit. Sipas informacionit të policisë Dibër, mësohet se ngjarja ka ndodhur rreth orës 14.00, në fabrikën e pasurimit të kromit e marrë me qira nga një shoqëri kineze. “Shtetasi me inicialet A.B teksa punonte me një automjet fadromë, për gërryerjen e një rezervuari, dyshohet se është shembur një masiv dherash dhe për pasojë, ka zënë poshtë punëtorin dhe mjetin e punës”, njoftoi policia.
Policia bëri me dije se shërbimet e policisë dhe ata të ekipit të urgjencës po punojnë për gjetjen e fadromistit shtetasit me inicialet A.B.
Ndërkohë po sipas informacionit paraprak të policisë, bëhet me dije se; -grupi hetimor ndodhet në vendngjarje dhe po punon për zbardhjen dhe dokumentimin e rrethanave të kësaj ngjarje.
Aksidenti i rëndë është i disati brenda pak javëve. Vetëm në fund të prillit tre punëtorë humbën jetën në vend, ndërsa puna në sektorë si ndërtimi, minierat dhe energjia mbetet e pasigurt.
