Kur dhe ku?
Para se të niseni për të votuar merrni me vete dokument identifikimi, pasaportë ose kartën e identitetit.
Qendrat e votimit janë të hapura nga ora 7 e mëngjesit deri në orën 19:00 të mbrëmjes.
Mbani parasysh se nëse jeni në rradhë në qendrën e votimit, ajo duhet të rrijë hapur deri sa te ketë votuar votuesi i fundit në pritje.
Verifikoni qendrën tuaj të votimit duke përdorur numrin personal apo të dhënat personale në linkun e Komisionit Qendror të Zgjedhjeve apo në linkun e E-Albania.
Vota e vlefshme
Që vota të jetë e vlefshme përdorni vetëm shenjat + dhe x.
Votoni për partinë ose koalicionin duke shënuar x ose + në kuadratin ngjitur me emrin e partisë apo koalicionit në krye të fletës së votimit. Kjo votë vlen edhe si votë për kandidatët në listat e mbyllura të partisë/koalicionit.
Votoni për kandidatin në listën e hapur duke shënuar me x ose + kutinë ngjitur me emrin e tij. Kjo votë vlen edhe si votë për partinë/koalicionin të cilit i përket kandidati.
Ju mund të votoni njëkohësisht edhe për partinë edhe për një nga kandidatët e të njëjtës parti në listën e hapur.
Kujdesuni që shenja të jetë e vendosur vetëm në kuadratet e një kolone në fletën e votimit.
Kujdes!
Ju nuk mund të votoni për një parti dhe për kandidatin preferencial në listën e një partie tjetër. Kjo e bën votën të pavlefshme.
Përdorni vetëm shenjat x dhe + brenda kutive të përcaktuara. Shenjat e tjera në fletë edhe nëse nuk e bëjnë të pavlefshme fletën, rrezikojnë ta bëjnë votën tuaj të identifikueshme duke cënuar të drejtën e fshehtësisë.
Nuk mund të zgjidhni më shumë se 1 kandidat preferencial. Nëse keni votuar dy të tillë, vota i numërohet vetëm partisë dhe listës së mbyllur.
Krimet zgjedhore
Ju rrezikoni 1 deri në 5 vite burg nëse pranoni apo ofroni para apo dhurata në këmbim të votës.
Kujdesuni që vota juaj të jetë e fshehtë. Fotografimi i votës dënohet me 3 muaj deri në 4 vite burg.
Veprimet që cenojnë zgjedhjet si votimi përmes kanosjes, falsifikimi apo dëmtimi i materialit zgjedhor dënohet me burg nga 3 muaj deri në 8 vite.
Votimi më shumë se një herë apo votimi për persona të tjerë, duke paraqitur dokumente identifikimi të rreme ose duke përdorur dokumente të zgjedhësve të tjerë, dënohet me burg 1 deri në 3 vjet.
