Fondacioni gjerman, Euronatur, ka publikuar gjetjet e raportit “The Killing 3.0” lidhur me premtimet e vendeve të Mesdheut, Afrikës dhe Lindjes së Mesme për të përgjysmuar shkallën e vrasjes së shpendëve deri në vitin 2030.
Për të parandaluar pasojat alarmante të humbjes së shpendëve migrues, rreth 46 shtete ndërmorën në Romë një plan strategjik të përbashkët për vitin 2020-2030 sipas Konventës së Bernës dhe Konventës për Mbrojtjen e Specieve Migruese.
“Shumica e vendeve të Mesdheut në Europë, si edhe ato të Afrikës Veriore dhe Lindjes së Mesme, kanë dështuar për të mbajtur premtimin e tyre për përgjysmimin e vrasjeve dhe tregtisë së paligjshme të zogjve deri në vitin 2030”, citon raporti i EuroNatur.
Raporti i EuroNatur dhe Birdlife International analizoi të dhënat e 46 shteteve, me fokus në 22 vende mesdhetare ku shkalla e vrasjeve është më e lartë.
“38 vende nuk kanë bërë progres në premtimin e tyre për uljen e shkallës së vrasjes së këtyre shpendëve, teksa situata në 9 vende është përkeqësuar,” citojnë gjetjet kryesore.
Sipas hartës së raportit, Shqipëria paraqitet me një reduktim të lehtë të nivelit të vrasjeve dhe tregtisë së paligjshme të specieve migruese, me 5-25% reduktim të vrasjeve.
“Disa specie shpendësh rrezikohen të zhduken përgjithmonë, ku prej tyre pëllumbi Streptopelia Turtur, Kali i Qyqes, si edhe gardelinat”, citon raporti i Euronatur.
Sipas raportit, kjo sjell më tej edhe humbjen e habitateve të këtyre shpendëve.
Aktivistët mjedisorë u shprehën se shkeljet e një shteti ndikojnë seriozisht në përpjekjet e suksesshme të shteteve të tjera në mbrojtjen e shpendëve.
“Nivelet e larta të vrasjeve të paligjshme në një shtet mund të sabotojnë përpjekjes e sukseshme të ruajtjes në një vend tjetër,” tha Dr. Barend van Gemerden, koordinator i programit Global Flyways.
“Na duhen urgjentisht veprime të koordinuara të përbashkëta dhe të forta”, vijoi ai.
Mjedisorët u shprehën se koha për premtime ka mbaruar dhe tanimë duhen masa urgjente në mënyrë që miliona zogj të tjerë të mos paguajnë çmimin.
“Vrasja e paligjshme e zogjve nuk është vetëm një krim, është një tragjedi që vijon të kërcënojë zogjtë përgjatë rrugëtimeve të tyre migruese”, përfundoi Barend Van Gemenden.
