Kolegji Zgjedhor rrëzoi të premten kërkesën e Partisë Demokratike ndaj vendimit të Komisionit të Ankesave dhe Sanksioneve, duke i hapur rrugën numërimit të votave të emigrantëve të cilët jetojnë në Greqi.
Përpara se të shpallej vendimi, edhe Komisioneri Shtetëror i Zgjedhjeve, Ilirian Celibashi doli me një vendim të ri për të vijuar procesin e numërimit dhe vlerësimit të votave nga jashtë, përfshi dhe ato nga shteti grek.
Votat e diasporës që jeton në Greqi u kontestuan nga Partia Demokratike me pretendimin se procesi i dorëzimit të zarfeve ishte bërë në kundërshtim me parashikimet kontraktuale me kompaninë DHL, pasi ishte kryer nga një nënkontraktor, nga për rrjedhojë zgjedhësit nuk kishin mundur të identifikoheshin sipas ligjit. Sipas PD-së, në kontratë ka qenë e ndaluar kryerja e nënkontraktimeve dhe megjithatë kjo ka ndodhur në shtetin grek dhe shpërndarja e materialeve zgjedhore është kryer nga operatorë të tjerë. Po ashtu, PD ngriti pretendime për cënim të standarteve dhe sigurisë zgjedhore, duke nënvizuar se nuk do lejonin të hapej asnjë zarf i mbërritur nga Greqia, pa u provuar se ai zarf ishte marrë personalisht nga zgjedhësi.
Bazuar në këto pretendime dhe argumente, PD paraqiti kërkesë pranë Celibashit, i cili mori vendim më 12 maj lidhur me administrimin e dokumentacionit shoqërues të votave.
Kjo vendimarrje u ankimua si absolutisht e pavlefshme nga ana e Partisë Socialiste pranë KAS, që e gjeti të drejtë këtë ankim duke lejuar vijimin e procesit të numërimit të votave të mbërritura nga Greqia. Në vijim, ishte sërish Partia Demokratike që ankimoi pranë Kolegjit Zgjedhor Gjyqësor vendimin e KAS, por kjo kërkesë u hodh poshtë.
Partia Demokratike nuk u paraqit në seancën e të premtes, me justifikimin se ishin të bllokuara rrugët për shkak të masave të marra për mbajtjen e Samitit të 6-të të Komunitetit Politik Evropian. Po ashtu, PD i kishte kërkuar Kolegjit shtyrjen e seancës gjyqësore, kërkesë që u gjet e pabazuar nga trupi gjykues me argumentin se objekti i padisë kërkonte një trajtim urgjent. Nuk kishte të pranishëm as përfaqësues së Partisë Socialiste, në cilësinë e palës së interesuar.
