Gjykata e Posaçme për Korrupsionin dhe Krimin e Organizuar vendosi të hënën më 19 maj të pranojë kërkesën e SPAK për kalimin për gjykim të çështjes në ngarkim të liderit të opozitës dhe ish-kryeministrit, Sali Berisha, i akuzuar nga SPAK për korrupsion pasiv. I pandehur për të njëjtën vepër penale në këtë çështje është edhe dhëndri i Berishës, Jamarbër Malltezi, i cili akuzohet për përfitimin e të ardhurave në vlerën e 5.4 milionë eurove nga një biznes ndërtimi, falë vendimeve të qeverisë të marra nga vjehrri i tij.
Në të njëjtën çështje, SPAK akuzon për korrupsion aktiv biznesmenin e ndërtimit, Fatmir Bektashi, ndërsa Xhimi Begeja dhe Andia Pustina akuzohen për pastrim parash. Si të pandehur në këtë çështje për akuzën e pastrimit të parave janë edhe shoqëritë Studio Pustina sh.p.k., Homeplan sh.p.k. dhe Kontakt sh.p.k.
Çështja ndaj Berishës dhe të pandehurve të tjerë u përmbyll në tetor të vitit të kaluar, kur SPAK e dërgoi në gjykatë për kalimin në gjykim. Pas shtyrjeve të njëpasnjëshme, kryesisht për shkaqe e kërkesa të paraqitura nga mbrojtësit e të pandehurve, seanca u përmbyll pas afro tetë muajve, nga gjyqtarja Flojera Davidhi.
Si Berisha ashtu edhe Malltezi i kanë kundërshtuar akuzat dhe e kanë cilësuar hetimin si të orkestruar nga kryeministri Edi Rama. Gjithashtu, Berisha dhe mbështetësit e tij e kanë cilësuar këtë masë si përpjekje për asgjësimin e opozitës.
Pas shpalljes së vendimit të gjyqtares Davidhi të hënën, avokati i Berishës, Genc Gjokutaj e kundërshtoi si të pabazuar këtë vendimarrje. Gjatë një deklarate para mediave, Gjokutaj i cilësoi të pavlefshme vendimet e marra prej gjyqtares Irena Gjoka dhe vërejti se nuk ishte kërkuar gjykim i shkurtuar nga ana e Berishës, pasi janë konstatuar fakte që janë të pabazuara. Sipas tij, gjyqtarja Gjoka kur ka marrë vendimet, nuk ka pasur kushtet për të qenë gjyqtare.
Gjokutaj deklaroi se kërkesën për pavlefshmërinë e vendimeve të Gjokës, gjykata e rrëzoi pa argumentuar. Ai theksoi se kjo vendimarrje po e mban Malltezin prej dy vitesh në arrest shtëpiak dhe Berishën, aq sa e mbajti në të njëjtën masë.
Gjokutaj e cilësoi Gjykatën e Posaçme si një agjenci të kryeministrit Edi Rama si dhe kontestoi një praktikë të mëparshme të Gjykatës së Lartë si të kundraligjshme, sipas së cilit, gjyqtari i seancës paraprake nuk mund ta pushojë çështjen, por se e ka vetëm themeli që mund të japë vendim për fajësinë ose jo.
Duke e cilësuar vendimin si një rekomandim shkollor, Gjokutaj theksoi se nuk kanë kërkuar gjykim të shkurtuar pasi mungon fakti penal dhe se do të vijojnë me gjykim të zakonshëm. Sipas tij, kjo gjykatë vleftësoi akte të pavlefshme.
Berisha, 80 vjeç, është zyrtari më i lartë i opozitës në tre dekada që përballet me një situatë të tillë ligjore. Hera e fundit që një ish-kryeministër është përballur me heqje imuniteti, arrestim dhe proces gjyqësor ka qenë në vitin 1993, kur mazhoranca e asaj kohe e Partisë Demokratike autorizoi arrestimin dhe përndjekjen e ish-kryeministrit socialist, Fatos Nano.
