Diskutimi në Këshillin e Lartë të Prokurorisë, KLP të premten më 23 maj i projekt-aktit për miratimin e kërkesës për trajtim financiar shtesë të prokurorit Neritan Hoxha për shkak të transferimit të tij në Prokurorinë e Pogradecit, evidentoi probleme në mënyrën e shpërblimeve të përcaktuara për raste të ngjashme.
Prokurori i Elbasanit, Neritan Hoxha u shkarkua nga detyra më 18 korrik të vitit të kaluar prej Komisionit të Pavarur të Kualifikimit, KPK për probleme në kriterin e pasurisë, ndërkohë që çështja e vetingut të tij pritet të shqyrtohet në Kolegj pas ankimit të kryer prej tij. Gjatë viteve të fundit, Hoxha është transferuar me pëlqimin e tij në Prokurorinë e Pogradecit. Për shkak të transferimit ai ka kërkuar në KLP që t’i caktohet masa e shpërblimit.
Përfaqësuesi i Komisionit të Planifikimit Strategjik, i Administrimit dhe i Buxhetit në KLP, Erion Fejzulla parashtroi kërkesën e prokurorit Hoxha, duke kërkuar caktimin e shpërblimit për vështirësi në punë sipas rregullores.
Rregullorja “Për caktimin e procedurës dhe masës së trajtimit financiar të prokurorit për shërbimin në skemën e delegimit, për transferimin e përkohshëm, për caktimin e përkohshëm për një çështje të veçantë”, e miratuar në nëntor të vitit 2023, përcakton dhënien e 80% të pagës bruto fillestare megjithëse ligji ka përcaktuar se shpërblimi për vështirësinë mund të jetë deri në 80%.
Anëtari Erind Mërkuri kundërshtoi duke theksuar se magjistrati nuk mund të kujtohej pas dy vitesh pa ushtruar në kohën e duhur asnjë ankim ndaj vendimeve të KLP-së të marra më parë për shpërblimin e tij për vështirësinë e transferimit.
Megjithëse Fejzulla e cilësoi situatën të thjeshtë, pasi nuk u është kërkuar vlera, Mërkuri këmbënguli se nuk duhej pranuar, pasi Këshilli ka vendosur sipas ligjit që i jep 2% të pagës bruto për çdo ditë pune.
Në diskutim ndërhyri edhe kryetarja Mirela Bogdani, e cila konstatoi se rregullorja ka qenë e miratuar me shpejtësi dhe shtoi se kjo është dhe arsyeja përse po rishikohet nga Këshilli.
Anëtari Zeqir Hoda konstatoi se ka qenë ky Këshill që për magjistratë të tjerë të transferuar e ka gjetur të arsyeshme të caktojë shpërblim në masën 80%. “Përse në këtë rast thuhet jo?’, pyeti ai.
Fejzulla ritheksoi se nuk është propozuar ndonjë shumë dhe propozoi që të shtyhej çështja për t’u konsultuar me materialet e komisionit. Ai sugjeroi që t’i kërkohej mendim edhe Prokurorisë së Përgjithshme.
Në këto rrethana, këshilli vendosi të shtyjë trajtimin e kësaj pike të rendit të ditës, si dhe t’i kërkojë mendim Prokurorisë së Përgjithshme për mënyrën e zgjidhjes së kësaj çështje, nisur nga fakti se është kjo e fundit që kryen pagesën.
KLP nuk i’u përgjigj deri në publikimin e këtij shkrimi pyetjes që BIRN i drejtoi lidhur me numrin e prokurorëve që kanë përfituar shpërblim në masën 80% për transferimet e tyre në prokuroritë e tjera, bazuar në rregulloren që sipas kryetares së KLP, është duke u rishikuar pasi ka probleme.
Në mbledhjen plenare të premten u diskutua ndër të tjera edhe mënyra e qasjes së KLP dhe të prokurorive me median. Duke sjellë në vëmendje një ankesë nga një prokuror i Sarandës lidhur me pretendimet ndaj gazetarëve të një televizioni, u konstatua ndër të tjera se magjistratët janë funksionarë publikë dhe për rrjedhojë duhet ta dinë nuk mund të jenë të paprekshëm.
Këshilltarët sollën në vëmendje se prokuroritë kanë koordinatorë për marrëdhënien me median e publikun. Në përfundim u propozua që të trajtohet mundësia për të realizuar takime periodike me përfaqësues të mediave, me qëllim qasjen sa më mirë me ligjin për të drejtën e informimit.
