Infektimi me bakterin salmonelë i 14 fëmijëve dhe një punonjësi të kopshtit të fëmijëve në Gramsh ka shkaktuar panik dhe protesta në qytet. Prindërit e fëmijëve të infektuar, edhe pse në numër të vogël, janë mbledhur të hënën para bashkisë së Gramshit për të protestuar ndaj mungesës së sigurisë ushqimore në institucion dhe për të kërkuar hetim të menjëhershëm mbi shkaqet e shpërthimit të infeksionit.
Një nga prindërit, babai i fëmijës së parë që u diagnostikua me salmonelë, tregoi për BIRN se fëmija e tij ka kaluar të paktën 72 orë në gjendje të rëndë shëndetësore.
“Një javë më parë fëmija im pati temperaturë, të vjella dhe diarre. 72 orë ishte dyll i verdhë. E trajtuam me serume në spital dhe më pas e sollëm në shtëpi. E kuptova që infeksioni vinte nga kopshti, sepse binjaku i tij, që ishte në shtëpi me lijë, nuk u prek,” shpjegoi ai.
Një prind tjetër, një grua rreth të 40-ave, tha se mungesa e informacionit zyrtar i ka lënë familjet në panik. “Të hënën në drekë fëmija im shfaqi temperaturë dhe sot bëhen tetë ditë që vazhdon me dhimbje barku dhe diarre. Në fillim nuk e dinim shkakun, por të enjten na u komunikua se ishte salmonelë. Jemi të shokuar”, tha gruaja.
Erald Çarçiu, prind i dy fëmijëve në të njëjtin kopsht dhe këshilltar i Partisë Demokratike në këshillin bashkiak, theksoi nevojën për transparencë dhe hetim të thelluar, ndërsa u ankua se prindërve u bëhej presion për të mos dalë në protestë.
“Ne jemi të paktë në numër, sepse prindërit janë marrë në telefon dhe janë intimiduar të mos marrin pjesë në protestë. I bëj thirrje prokurorit të Elbasanit, Kreshnik Ajazi, të hetojë rastin dhe të kujdeset për shëndetin e fëmijëve të Gramshit, vendlindjes së tij”, tha Çarçiu.
Por kryetari i bashkisë, Besian Ajazi, u shpreh se rastet e infektimit nuk janë në përmasat që janë raportuar në media dhe këmbënguli se ushqimi monitorohet në mënyrë periodike. “Nuk mund të dalim në përfundime përpara se të përfundojnë analizat nga organet kompetente”, tha Ajazi.
Ai shtoi se ushqimi gatuhet brenda ambienteve të kopshtit dhe jo nga kompani kateringu, duke mohuar problemet me sigurinë ushqimore.
Ajazi po ashtu këmbënguli se nuk kishte presion ndaj prindërve. Ai mandje akuzoi një nga protestuesit se po përdor fëmijët e vet për politikë. “Askush nuk është intimiduar dhe nuk ka pretendime të faktuara për presion ndaj prindërve,” tha Ajazi.
Ndërkohë situata në qytet është bërë edhe më serioze pas publikimit të analizave të fundit, të cilat konfirmuan se një punonjës i kopshtit ishte gjithashtu i infektuar me salmonelë. Shefi i Inspektoriatit Shëndetësor për Qarkun e Elbasanit, Enver Shkurti, tha se ende priten rezultatet e analizave të produkteve ushqimore për të përcaktuar burimin e infeksionit.
Ndërkohë Mjekja bakterologe, Adrisa Xhaxha, theksoi se fëmijët nën 5 vjeç janë më të rrezikuarit nga infeksioni me salmonelë.
“Salmoneloza merret nëpërmjet ushqimit. Simptomat janë temperaturë, diarre dhe dhimbje barku, që fillojnë 6 orë deri në 6 ditë pas infektimit dhe mund të zgjasin deri në 7 ditë. Ushqimet më të rrezikshme janë mishi i pulës, vezët, si dhe çdo frut apo perime që mund të jetë larë me ujë të ndotur,” sqaroi Xhaxha.
