Prokuroria e Posaçme kundër Korrupsionit dhe Krimit të Organizuar, SPAK njoftoi të enjten më 5 qershor përfundimin e hetimeve për 37 të pandehur, anëtarë të dy grupeve me veprimtari në trafikun e qenieve njerëzore, si dhe dërgimin e çështjes gjykim.
Sipas SPAK, dy grupet e strukturuara kriminale, përgjatë viteve 2022 dhe 2024 kanë organizuar dhe ndihmuar kalimin e paligjshëm të kufijve detarë, ajrorë dhe tokësorë, kryesisht të shtetasve shqiptarë drejt Mbretërisë së Bashkuar, Shteteve të Bashkuara të Amerikës dhe Kanadasë. Veprimtaria e të pandehurve përfshinte prodhimin e dokumenteve të falsifikuara të identifikimit, kryesisht të dokumentatave të vendeve të Bashkimit Europian si, pasaporta, karta identiteti, leje drejtimi dhe dokumenta të tjera; gjetjen apo ndërmjetësimin për personat që do të udhëtonin drejt vendeve të destinacionit dhe mënyrën e kryerjes së pagesave; transportimin e dokumentave dhe të personave që do të udhëtonin; si dhe akomodimin dhe udhëzimin e tyre për itinerarin që do të ndiqnin. Këto veprime janë realizuar nga agjensitë e udhëtimit “Domi Travel” dhe “Boris Travel”, që ka në bashkëpunuar me njëra-tjetrën.
Po ashtu, personat që kishin interes të udhëtonin drejt këtyre vendeve, udhëzoheshin për përdorimin e dokumenteve dhe se si duhet të silleshin gjatë intervistës që të mund të pajiseshin me vizë amerikane dhe kanadeze.
SPAK sqaron se ka konstatuar se të pandehurit siguronin realizimin e proceseve të ndryshme. Nga hetimi ka rezultuar se ata njihnin njëri-tjetrin dhe kanë qenë në dijeni për rolin e gjithsecilit – rrethana që sipas prokurorisë, tregojnë se veprimtaria është e paramenduar, e mirëorganizuar dhe me detyra dhe role të përcaktuar dhe qëllimi i saj është përftimi material.
Gjatë hetimit, në qytetin e Tiranës është zbuluar një ambient në të cilën prodhoheshin dokumenta identifikimi si pasaporta të vendeve të Bashkimit Evropian, një ambient ku janë gjetur dhe sekuestruar dokumenta të ndryshëm, të falsifikuara si edhe 37 vula të ndryshme, kryesisht të institucioneve shtetërore dhe private, përmes të cilave mundësohej falsifikimi i dokumenteve të përdorur edhe gjatë aplikimeve për viza. Po ashtu, janë gjetur vlera monetare në shumat prej 25 mijë euro dhe 20 mijë paund, sende me vlerë, një ambient i përshtatur për falsifikim të dokumentave, kompjutera dhe printera që shërbenin për shitje dhe transferta të monedhave virtuale.
Për realizimin e hetimit është krijuar një skaudër e përbashkët hetimore me autoritetet spanjolle, si dhe është bashkëpunuar me Agjencinë Federale Amerikane DSS/OCIU, Njësinë e Hetimeve Kriminale me prezencë në Ambasadën e SHBA-së Tiranë, si dhe me agjensi të ndryshme të huaja ligjzbatuese.
Procedimi është regjistruar për veprat penale “Ndihmë për kalim të paligjshëm të kufijve”; “Falsifikimi i letërnjoftimeve, pasaportave ose vizave”; “Falsifikimi i dokumentave”; “Grup i strukturuar kriminal”, të kryera në formën e bashkëpunimit të veçantë; “Kryerje e veprave penale nga organizata kriminale apo grupi kriminal”; “Falsifikimi i vulave, stampave ose formularëve”; “Prodhimi i mjeteve për falsifikim të dokumentave, prodhimi apo mbajtja e mjeteve për të kryer falsifikim të dokumentave”; “Kultivim i bimëve narkotike” dhe “Prodhim dhe shitje e narkotikëve” të kryera në bashkëpunim, si dhe “Shpërdorim detyre”.
