Prokuroria e Posaçme kundër Korrupsionit dhe Krimit të Organizuar, SPAK, njoftoi të martën, më 10 qershor, emrat e 13 kandidatëve që i janë përgjigjur thirrjes së hapur për pozicionin e Drejtorit të Byrosë Kombëtare të Hetimit, BKH. SPAK publikoi listën e kandidatëve sipas rendit alfabetik, duke sqaruar se do të vijojë me fazën e verifikimit paraprak, gjatë së cilës Komisioni i Përzgjedhjes do të shqyrtojë dokumentacionin e paraqitur për të vlerësuar përmbushjen e kushteve ligjore dhe kritereve të përcaktuara në ligjin nr. 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar”.
Kandidatët që kalojnë fazën e verifikimit paraprak do të ftohen për të marrë pjesë në fazat pasuese të procesit, përfshirë testin fizik, testin me shkrim për aspektin profesional dhe testin e poligrafit. Mes tyre gjenden prokurorë dhe ish-drejtues të Policisë së Shtetit.
Komisioni i Përzgjedhjes përbëhet nga prokurorët Altin Dumani, Arben Kraja dhe Behar Dibra.
Më 28 mars, ish-drejtoresha e Byrosë Kombëtare të Hetimit, Aida Hajnaj, shprehu interes për një mandat të dytë 5-vjeçar dhe SPAK nisi procedurën e riemërimit. SPAK i tha atëherë BIRN-it se, në kushtet kur Hajnaj kërkonte një mandat të dytë, bazuar në ligjin 95/2016 të Strukturës së Posaçme, do të vlerësohej fillimisht vetëm kandidatura e saj, në cilësinë e drejtoreshës në detyrë. Sipas ligjit, nëse drejtori në detyrë nuk kalonte të gjitha fazat e përzgjedhjes në procedurën e riemërimit, Komisioni do të përmbyllte këtë proces dhe do të çelte një procedurë të re përmes gare të hapur, ku mund të aplikonin të gjithë kandidatët që plotësonin kriteret ligjore për pozicionin e drejtorit të BKH-së.
SPAK njoftoi më 13 maj se Hajnaj nuk do t’i nënshtrohej procedurës së riemërimit, pasi ndonëse shfaqi interes për një mandat të dytë, nuk dorëzoi dokumentacionin e kërkuar brenda afatit të përcaktuar nga Komisioni i Përzgjedhjes. Si pasojë, u hap gara e re për të gjithë të interesuarit.
Byroja Kombëtare e Hetimit është struktura e specializuar e Policisë Gjyqësore, që kryen veprimet hetimore nën drejtimin e Prokurorisë së Posaçme.
Të 13 kandidatët për pozicionin e drejtorit të BKH-së janë: Andi Pogaçe, Artur Beu, Astrit Halilaj, Elton Kërluku, Gentian Ndoi, Gentjan Shehaj, Gledis Nano, Haki Çako, Joni Keta, Maoricio Sheldija, Marinela Pilinçi, Miklovan Kanani dhe Nevrus Ndregjoni.
