Një turist mbeti i plagosur mesditën e së shtunës në ujërat e plazhit të Gjipesë, pasi u godit nga një mjet lundrues tip gomone jashtë zonës së sigurisë së notuesve.
Policia e Kufirit tha se ngjarja ndodhi rreth orës 13:40, kur shtetasi K. V., 27 vjeç, banues në Orikum, duke lundruar me dokumentacion të rregullt dhe në një distancë të konsiderueshme nga tapat e zonës së ndaluar për mjete, dyshohet se ka dëmtuar shtetasin D. S., 46 vjeç, banues në Gjermani, i cili ndodhej duke bërë zhytje pranë gomones.
Sipas burimeve zyrtare, efektivët e Stacionit të Policisë Kufitare në Dhërmi ndërhynë menjëherë pas njoftimit, duke i dhënë ndihmën e parë të dëmtuarit dhe duke organizuar transportimin e tij drejt spitalit për trajtim mjekësor.
Ndërkohë, drejtuesi i mjetit lundrues është shoqëruar në ambientet e Komisariatit së bashku me disa persona që ndodheshin në vendngjarje dhe që u identifikuan si dëshmitarë.
Prokuroria ka nisur hetimet për të zbardhur plotësisht rrethanat e incidentit, ndërsa grupi hetimor vijon marrjen e deklarimeve dhe këqyrjen e provave.
