Komisionet parlamentare shqyrtuan dhe miratuan të hënën projektligjin “Për miratimin e Strategjisë Kombëtare kundër Ndërhyrjeve të Huaja dhe Dezinformimit”, një dokument i hartuar nga Komisioni i Posaçëm që u drejtua nga deputeti socialist, Erion Braçe.
Braçe e mbrojti draft-strategjinë para deputetëve si një dokument të hartuar mbi bazën e akteve dhe rekomandimeve të Bashkimit Europian dhe si një angazhim parlamentar për marrjen e masave të mëtejshme ligjore për të luftuar sulmet kibernetike apo ndërhyrjet e huaja përmes formave të dezinformimit.
Deputetë të opozitës, por dhe të mazhorancës ngritën pyetje mbi rreziqet që këto masa mund të cënojnë lirinë e medias apo të krijojnë mundësitë për të kontrolluar median me preteksin e luftën kundër dezinformimit.
Në komisionin e Sigurisë Kombëtare, deputeti demokrat Asllan Dogjani vuri në dyshim qëllimet e strategjisë dhe sugjeroi se ajo paraqet rreziqe për liritë themelore, si lirinë e shprehjes dhe pluralizimin politik në vend.
“Duket pozitiv po ka rreziqe të mëdha për lirinë e shprehjes dhe pluralizimit, nuk bëhet për të luftuar dezinfomimin por ka si qëllim kryesor kontrollin politik mbi informacionin,” pretendoi Dogjani, duke shtuar se “do t’i mbyllë gojën medias dhe opozitës”.
“Çfarë mekanizmi do të ndajë ndërhyrjet e huaja nga kritikat legjitime që i bëhen pushtetit?”- pyeti ai nismëtarin e projektligjit, duke shprehur shqetësimin se me anë të këtij instrumenti çdo organizatë joqeveritare, organizatë politike apo media të ndryshme mund të shpallen si instrumente të ndikimeve të huaja.
Në përgjigje, deputeti Braçe tha se strategjia nuk ka asnjë rresht që cënon punën e gazetarëve, por përkundrazi është hartuar në bashkëpunim me vetë organizatat për lirinë e medias dhe rekomandimet e lëna çdo vit në progres-raportet e Bashkimit Europian.
Duke iu referuar objektivit të strategjisë për transparencën financiare dhe pronësisë së medias ai tha se “ky objektiv nuk është shkruar nga anëtarët e komisionit, por është shkruar nga organizatat e medias”.
“Kanë rënë ato nismat për shpifjen, çdo gjë do të bëhet mbi aktet e BE-së,” iu përgjigj Braçe Dogjanit.
Ndërsa deputeti tjetër opozitar, Enkelejd Alibeaj ngriti shqetësimin për kontrollin e medias nga pushteti dhe vetecensurimi i saj për shkak të interesave financiare të pronarëve, duke pyetur Braçen se si e zgjidh kjo strategji këtë problem. Por Braçe theksoi se puna e komisionit të posaçëm që ai drejtoi është fokusuar vetëm tek faktorët e jashtëm dhe jo tek dezinformimi i brendshëm.
Edhe në komisionin e Ligjeve, ku opozita mungonte, deputetja socialiste Ermonela Felaj ngriti pyetje për garancinë që kjo strategji jepte për bashkëpunimin e mediave online në luftën kundër dezinformimit. Braçe ritheksoi se komisioni ka pasur si qëllim që median ta ketë pjesë të punës së komisionit dhe se çdo objekt i shprehur ishte bazuar në aktet dhe rekomandimet e BE-së.
“Asgjë që mund të ketë paragjykuar punën e komisionit nuk ka në këto objektiva dhe organizatat e mediave do të vijojnë të jenë pjesë e planit të veprimit,” theksoi ai.
Komisioni i posaçëm kundër dezinformimit u ngrit me synimin për rishikimin e kuadrit ligjor për parandalimin e ndërhyrjeve të huaja në proceset demokratike dhe në proceset zgjedhore në të ardhmen. Puna e komisionit u bojkotua nga opozita parlamentare, por ai vijoi në mënyrë të njëanshme dhe realizoi seanca dëgjimore me një sërë institucionesh publike dhe aktorë të shoqërisë civile, duke dalë në përfundim me një strategji kombëtare. Objektivat kryesorë fokusohen në forcimin e kapaciteteve institucionale për të parandaluar, zbuluar dhe analizuar ndërhyrjet e huaja në fushatat zgjedhore, në përmirësimin e mekanizmave të monitorimit dhe raportimit mbi ndikimet e huaja në proceset zgjedhore dhe financimin politik të partive politike dhe aktorëve që bëhen pjesë e zgjedhjeve.
Ky dokument shoqërohet dhe nga një plan-veprimi që angazhon Këshillin e Ministrave për miratimin e akteve ligjore që do të bëjnë të mundur zbatimin e strategjisë.
