Prokuroria e Posaçme Kundër Korrupsionit dhe Krimit të Organizuar, SPAK njoftoi të premten më 27 qershor përfundimin e hetimeve ndaj dy personave të akuzuar për korrupsion në zgjedhje, gjatë periudhës kur po zhvillohej fushata për zgjedhjet parlamentare në muajin maj. I pandehuri Pandeli Bozha akuzohet për veprën penale “korrupsion aktiv në zgjedhje” ndërsa i pandehuri tjetër, Vladimir Lushkaj, për “korrupsion pasiv në zgjedhje”. Çështja penale në ngarkim të tyre i është përcjellë gjykatës për t’u kaluar për gjykim.
Sipas SPAK, është dokumentuar se paraditen e datës 8 maj, tri ditë para se të votohej, Bozha ka shkuar në banesën e shtetasit Vladimir Lushkaj dhe i ka futur në xhep këtij të fundit një kartëmonedhë dhe i ka treguar një fletë të ngjashme me atë të votimit, duke i sugjeruar emrin e kandidatit për të cilin duhet të votonte. Në njoftim sqarohet se, pas marrjes në pyetje, Lushkaj ka dorëzuar pranë oficerëve të policisë gjyqësore kartëmonedhën dhe një fletë të ngjashme me atë të votimit, ku emri i kandidatit për deputet ishte theksuar me ngjyrë portokalli.
I pandehuri Pandeli Bozha është babai i kandidates për deputete e Partisë Socialdemokratike në Fier, Limonera Bozha. Kjo e fundit u ankua gjatë fushatës se u shkarkua pasi shpalli kandidaturën në mënyrë të paligjshme nga Abpetrol dhe në shkelje që së drejtës së saj për të kandiduar.
