Çështja e vetingut për ish-gjyqtaren e Gjykatës së Lartë, Majlinda Andrea ekspozoi mosveprimin e Këshillit të Lartë Gjyqësor, KLGJ lidhur me statusin e saj pas dënimit me formë të prerë për korrupsion. Në seancën e të hënës më 14 korrik, prokurori Klodian Braho, i cili përfaqëson në këtë çështje drejtuesin e SPAK, Altin Dumani, deklaroi se ishte njohur me përgjigjen e KLGJ-së lidhur me statusin e Andreas, duke theksuar se institucioni i qeverisjes së gjyqësorit ishte ende në kushtet e mosveprimit pasi nuk e kishte përmbushur detyrimin për shkarkimin e saj.
Megjithatë, Braho tha se u qëndronin gjithë shkaqeve të ankimit, ndaj vendimarrjes së Komisionit të Pavarur të Kualifikimit, që konstatoi se Inspektori i Lartë i Drejtësisë, ILD dhe KLGJ për gjashtë vjet radhazi nuk kishin ushtruar kompetencat e tyre për t’i hequr Andreas statusin e magjistratit. Për këtë arsye Komisioni vendosi shkarkimin e këtij subjekti rivlerësimit, duke vlerësuar se ishte një mënyrë për të zgjidhur përfundimisht statusin e saj të magjistratit.
Por, Komisioneri Publik, Florian Ballhysa e cilësoi të gabuar arsyetimin e Komisionit. Ai çmoi se ushtrimi nga ana e Komisionit i kompetencës kushtetuese të kryerjes së procesit të vetingut duke sjellë shkarkimin e magjistratit të dënuar, nuk mund dhe nuk duhet të zëvendësojë ardhjen e pasojës, për arsye të mosveprimit të ILD-së dhe KLGJ-së, të cilët Kushtetuta i detyron të veprojnë në rastin konkret.
Prokurori Braho kërkoi gjatë konkluzioneve përfundimtare të hënën që procedura e vetingut të Andreas të deklarohet e përfunduar pa një vendim përfundimtar, megjithëse ILD dhe KLGJ nuk e kanë përmbushur detyrimin kushtetues për të dhënë masën disiplinore të shkarkimit ndaj saj.
Ish-gjyqtarja Andrea nuk ishte e pranishme as në seancën e të hënës, megjithëse nga sa u deklarua prej Kolegjit, ajo kishte konfirmuar se kishte marrë dijeni për datën dhe orën që do të zhvillohej.
Pasi Kolegji vendosi mbylljen e shqyrtimit gjyqësor, u tërhoq për të marrë vendim që do të shpallet më datë 23 qershor, në orën 15:00.
