Prokuroria e Posaçme kundër Korrupsionit dhe Krimit të Organizuar, SPAK njoftoi të premten më 25 korrik përfundimin e hetimeve ndaj avokates Erida Lazimi dhe biznesmenit Astrit Vladi, të akuzuar për ushtrim të ndikimit të paligjshëm tek një gjyqtar i Gjykatës së Tiranës, për të favorizuar të pandehurit e dosjes së njohur si “Toyota Auris”.
Sipas SPAK, ky procedim është ndarë nga një dosje tjetër e regjistruar në dhjetor të vitit të kaluar, që ka si objekt hetimin e veprime të një numri të konsiderueshëm funksionarësh dhe ish-funksionarësh të sistemit të drejtësisë, për ushtrim ndikimi, korrupsion pasiv i gjyqtarëve, prokurorëve e funksionarëve të tjerë të drejtësisë, trafik të narkotikëve dhe pastrim parash – që është vijimësi e dosjes penale ndaj ish-drejtuesit të Prokurorisë së Vlorës, Aurel Zarka, ish-oficeres së Policisë Gjyqësore, Eriona Daupaj, avokatit Radovan Çela dhe biznesmenit Astrit Vladi, të akuzuar për ndikim të paligjshëm e korrupsion në çështjen e “Toyota Auris”.
Në njoftim thuhet se nga hetimet e kryera është provuar se i pandehuri, Astrit Vladi i ka kërkuar avokates Erida Lazimi, të ushtrojë ndikim të paligjshëm te gjyqtari i seancës paraprake, me qëllim për të favorizuar të pandehurit e çështjes “Toyota Auris”. Më 14 shtator të vitit5 2020 është zhvilluar seanca paraporake për gjykimin e kërkesës për dërgim në gjyq të të pandehurve Alfred Vladi, Elvis Vladi dhe Alban Mollaymeri, të akuzuar për veprën penale “Mosdeklarim në kufi i të hollave dhe sendeve me vlerë”, pasi në dy automjete të llojit “Toyota Auris”, që transportonin u gjetën rreth 3.4 milionë euro. Çështja ndaj tyre u hetua fillimisht në ish-Prokurorinë e Krimeve të Rënda nga prokurorët që sot shërbejnë në SPAK, Ened Nakuçi dhe Doloreza Musabelliu, përpara se të dërgohej për kompetencë në Prokurorinë e Tiranës.
“E pandehura Erida Lazimi i ka premtuar dhe i ka siguruar të pandehurit, Astrit Vladi aftësinë për të ushtruar ndikim të paligjshëm te gjyqtari i seancës paraprake, kundrejt përfitimit të parregullt në formë monetare, me qëllim për të favorizuar personat, për të cilët ishte kërkuar dërgimi i çështjes në gjyq në atë procedim penal”, citohet në njoftimin e SPAK.
SPAK bënë me dije se po vijon hetimet paraprake për episode të tjera të korrupsionit dhe ndikimit të paligjshëm për këtë çështje dhe episode të tjera.
Çështja “Toyota Auris” mori rëndësi publike në Shqipëri, pasi kreu i Partisë Demokratike, Lulzim Basha e denoncoi në vitin 2018 mbërritjen e parave disa ditë para se ato të sekuestroheshin në Durrës. Basha paralajmëroi trafikimin e parave me makina “Toyota Auris” dhe akuzoi kreun e grupit socialist, Taulant Balla se kishte dalë garant për ato që i quajti “para të drogës”.
Balla i mohoi akuzat dhe fitoi në gjykatë një padi për shpifje ndaj Bashës.
