Ka marrë një kthesë tjetër odiseja ligjore për një mandat deputeti në Tiranë, i fituar nga koalicioni ‘Nisma Shqipëria Bëhet’ e drejtuar nga Adriatik Lapaj e Endrit Shabani, pasi dy krerët e koalicionit u përfshinë në një konflikt publik se kujt i takonte ky mandat.
Komisioni i Ankimimeve dhe Sanksioneve vendosi të mërkurën që të rrëzojë një vendim të mëparshëm të kryekomisionerit Ilirjan Celibashi për t’i dhënë mandatit Kleana Xhuvelit, kandidates së katërt në listën e mbyllur të këtij koalicioni dhe t’ia kalojë këtë mandat Ana Dajkos, emrit të parë në këtë listë.
Të dyja kandidatet janë afërme të Lapajt.
Vendimi nuk kënaqi pritshmërinë e “Shqipëria Bëhet” të Lapajt, që kishte kërkuar nga KAS që mandatin t’ia jepte Lapajt, kandidati me më shumë vota në listën e hapur, duke njohur kështu një akt dorëheqje të dorëzuar në Komisionin Qendror të Zgjedhore nga kandidatët e listës së mbyllur.
Por, sipas KAS, dorëheqjet e dorëzuara nga kandidimi ishin ‘nul’ dhe nuk mund të merreshin në konsideratë.
“Në këto kushte, ky akt nuk ka asnjë pasojë juridike, sepse heqja dorë nga kandidimi nënkupton në vetvete prishjen e listës të kandidimit të atij subjekti zgjedhor, e cila ka pasojë ligjore ndalimin e konkurrimit të këtij subjekti në zgjedhje,” tha Elvis Çefa, anëtar i KAS dhe relatori i çështjes, Elvis Çefa.
Vendosja e familjarëve të tyre në listë të mbyllur u trumbetua nga Lapaj dhe Shabani si një strategji politike për të ‘rrëzuar’ sistemin zgjedhor me lista të mbyllura dhe të hapura, por që u kthye në burim konflikti pas zgjedhjeve.
