Diskutimi në Këshillin e Lartë të Prokurorisë i një projektvendimi për praktikën profesionale të kandidatëve për prokurorë në vitin akademik 2025-2026 të Shkollës së Magjistraturës, u kthye në një debat mëngjesin e së mërkurës mes dy anëtarëve të Komisionit për Zhvillimin e Karrierës, prokurorëve Ledina Riza dhe Sokol Stojani. Megjithëse kjo pikë ishte parashikuar e fundit në rendin e ditës, anëtari Vatë Staka parashtroi që në fillim të seancës shqetësim se, për mentorimin e magjistratëve, ishin propozuar prokurorë të rinj, ndërkohë që ishin përjashtuar prokurorë të tjerë me 20 vjet punë.
Legjislacioni parashikon që kandidatët për prokurorë, gjatë vitit të praktikës ndihmohen nga një prokuror mentor, i cili në fund jep dhe vlerësimin përkatës. Relatorja e kësaj çështje, Ledina Riza tha se komisioni i kishte sqaruar të gjithë anëtarët përse kishte vlerësuar kështu.
Pas Stakës, edhe anëtari i komisionit, Sokol Stojani e konsideroi relacionin për mentorët e propozuar si të deformuar. “Dje lexova relacionin e relatorit dhe shoh arrogance,” tha Stojani.
Ai nënvizoi se relatorja Riza ka shmangur prokurorët me eksperiencë, për të cilët tha se kanë qenë si “profesorë” të tij kur kishte ushtruar detyrën në Prokurorinë e Tiranës. Stojani shtoi se relacioni që i është prezantuar Këshillit është diçka që nuk ka kaluar në Komisionin e Zhvillimit të Karrierës dhe e cilësoi shumë të rëndë këtë situatë.
“Kjo arrogancë është skandal. Ai relacion duhet injoruar. …Ky është skandal,” deklaroi Stojani dhe shtoi se do të thërriste Inspektorin e Lartë të Drejtësisë të kryente verifikime.
Riza tha në seancë se ua kishte bërë të njohur relacionin gjithë anëtarëve të Këshillit dhe se kishte ardhur momenti për të ndjekur një skemë të re në përzgjedhjen e prokurorëve që do të kryejnë mentorimin e kandidatëve për prokurorë gjatë kryerjes së praktikës profesionale.
Relatorja Riza theksoi se Këshilli duhet të jetë i kujdesshëm dhe të respektojë ligjin në përcaktimin e mentorëve. Ajo shtoi se “kolegu Stojani flet me emra, por përzgjedhja është procedure”. Riza vërejti se kishte qenë e hapur dhe prandaj e kishte diskutuar me të gjithë, ndaj “nuk mund të lejonte të përgojohet si relatore”.
Por, Stojani konstatoi se deformimi kishte ndodhur pasi në realcion kishte shtesa që ishin kryer pas takimeve informale të kryera prej Rizës me anëtarët e Këshillit, pas vendimarrjes së Komisionit. Ai u shpreh se relacioni duhej të kishte mendimin e shumicës dhe të pakicës, ashtu si ishte diskutuar në komision.
“Arroganca juaj me një relacion që nuk është i komisionit është e rëndë. Jam ndjerë i fyer si anëtar i komisionit. Unë kam thënë t’i shtrohet analizës,” tha Stojani.
Ai theksoi se është në interes të studentit që të trajnohet nga prokurorët më të mirë. Në vijim, Stojani e pyeti Rizën se si ajo, duke qenë e patrajnuar shkonte dhe trajnonte prokurorët që do kryenin mentorimin. Ai vërejti se Riza gjendet në listën e ekspertëve të Shkollës së Magjistraturës që trajnojnë prokurorët, por relatorja e cilësoi të gënjeshtërt këtë konstatim.
Stojani këmbënguli që emri i saj gjendej në kalendarin e ekspertëve të Shkollës së Magjistraturës, ndërkohë që nuk lejonte ata prokurorë me 40 vjet punë eksperiencë që të kryenin mentorim.
“Është e papranueshme që një prokuror i patrajnuar të bëjë trajnimin e mentorëve,” deklaroi ai.
E pyetur nga BIRN*, relatorja Ledina Riza tha përmes një bisede telefonike se nuk ka qenë asnjëherë në listën e mentorëve dhe se nuk e ka parë ndonjëherë këtë listë. Riza shpjegoi se ishte ngarkuar si anëtare e Këshillit për të punuar rregulloren e mentorimit. Sipas saj, nuk ka qenë ndonjëherë trajnuese për mentorimin, por se vetëm njëherë kishte qenë si eksperte për integritetin. “Edhe pse kam ekspertizë të mjaftueshme për mentorimin,” tha ajo.
Riza tha gjithashtu se nuk bëhej fjalë për emra konkretë, por për trajtimin e barabartë të prokurorëve.
“Në propozimin tim janë vetëm ata që kanë trajnim, pasi të parin kam ligjin dhe parimin. Unë kam zbatuar kriterin ligjor, kam zgjedhur të punoj me dinjitet”, tha Riza duke shpjeguar se legjislacioni përcakton që prokurorët mentorë të jenë trajnuar për të udhëhequr praktikën e kandidatëve për prokurorë.
Ajo tha se kishte propozuar përzgjedhjen me short, ndërsa lista ishte hartuar nga këshilltari përkatës sipas trajnimeve për mentorim të kryera nga secili prokuror.
Diskutimi për pikën e rendit të ditës lidhur me trajtimin e procesit të përzgjedhjes së mentorëve të kandidatëve për prokurorë, së bashku dhe me dy çështje të tjera, u shtynë të trajtohen në mbledhjen që do të zhvillohet të enjten, në orën 10:00.
*Shkrimi u përditësua për të përfshirë qëndrimin e anëtares së KLP, Ledina Riza.
