Ylli ndërkombëtar i muzikës pop, Dua Lipa, u kthye si protagoniste në ditën e parë të Festivalit Sunny Hill, i organizuar nga familja e saj në qytetin e saj të lindjes, Prishtinë, në kuadër të turneut të saj botëror “Radical Optimism”.
Gjatë pauzave midis performancave, Lipa iu drejtua publikut në gjuhën amtare, duke i falënderuar për mbështetjen që nga viti 2016, “në koncertin tim të parë” në Prishtinë.
“Që atëherë kemi pasur gjashtë edicione të festivalit,” kujtoi ajo të premten mbrëma, duke përfshirë edhe atë koncert të vetëm në fillimet e karrierës së saj si ngjarjen që nisi festivalin që tani është ndërkombëtar. “Kosova ka lezet dhe kështu i tregojmë botës,” tha ajo e emocionuar në shqip.
Një ditë më herët, Lipa bëri bujë ndërkombëtare pasi mori pasaportën e Kosovës me dekret presidencial.
Për të dytin vit radhazi, festivali u mbajt në fshatin Bernicë, në periferi të Prishtinës.
Në vitin 2024, babai i Duas dhe themeluesi i festivalit, Dukagjin Lipa, i tha BIRN-it se trualli prej 17 hektarësh i dhënë nga komuna e Prishtinës për 99 vjet do të ndihmojë në rritjen e festivalit. Dua Lipa nuk performoi në vitin 2024, por ishte e pranishme.
Edicionet e mëparshme të festivalit janë mbajtur në parkun e mbrojtur të Gërmisë, gjë që kishte ngjallur kritika për dëmtim të mundshëm të natyrës.
Në vitin 2022, kishte pengesa burokratike në lidhje me vendndodhjen e festivalit dhe organizimin paralel të tij edhe në Shqipëri. Por Lipa tha se tani ekziston një marrëveshje me autoritetet lokale dhe qendrore për çështjet logjistike dhe infrastrukturore. Autobusët e qytetit ofrojnë transport falas për ndjekësit e festivalit.
Ashtu si në vendet e tjera gjatë turneut, Lipa bashkëbisedoi me pjesëmarrës nga Kosova, Turqia, Belgjika, Italia dhe Polonia, dhe këndoi një këngë shqip të viteve 1980 me babanë e saj, i cili më parë ka qenë vokalist në një grup muzikor.
“Ta ndaj këtë mbrëmje me ju të gjithë në qytetin që më formësoi, e rrethuar nga kaq shumë energji, gëzim dhe krenari… është e vështirë ta përshkruaj me fjalë çfarë do të thotë. Të performoja për ju dhe të ndaja skenën me babain tim, Dukagjin Lipën, ishte një moment që nuk do ta harroj kurrë,” shkroi ajo më pas në Instagram.
Në natën e dytë të festivalit, Shawn Mendes ishte kryeartisti dhe njëkohësisht hapi turneun e tij botëror. Ishte hera e parë që një këngëtar ndërkombëtar e hapte turneun e tij në Prishtinë, një qytet që më parë kishte pak mundësi për të parë artistë të tillë në skenë, përpara se të fillonte festivali Sunny Hill.
“Prishtinë, faleminderit! Keni një shpirt të mrekullueshëm,” u tha Mendes të pranishmëve në festival.
Mes rritjes së turistëve, me rreth 30,000 bileta të shitura dhe raportimeve se akomodimi në qytet ishte i rezervuar plotësisht gjatë fundjavës, infrastruktura e transportit të qytetit u vu në provë, me të gjitha rrugët kryesore që të çonin në vendin e festivalit të bllokuara.
Dita e fundit e festivalit iu kushtuar DJ-ve dhe u mbyll nga DJ koreano-jugore me bazë në Berlin, Peggy Gou.
