Një faqe në rrjetin social të Facebook filloi të postojë lajme të rreme të hënën pasdite, nën emrin e Asocacionit të Gazetarëve të Shqipërisë, AGSH. Postimet e faqes së titulluar “Asocacioni i Gazetarëve Shqiptarë” pretendojnë se “kërkimi i të drejtave i ka përçarë”.
“Nuk kam asnjë ide se kush mund të fshihet pas këtij profili në Facebook që synon qartazi përçarjen e gazetarëve dhe organizatës që unë drejtoj,” i tha BIRN kreu i Asocacionit, Isa Myzyraj.
“Unë mendoj se sulmi vjen ekskluzivisht si pasojë e zhvillimeve në Neës 24 dhe qëndrimeve që AGSH ka mbajtur për cështjen”, shtoi Myzyraj, duke theksuar se AGSH është pranë gazetarëve dhe lirisë së medias në çdo rast që prej ditës që është krijuar.
Faqja u aktivizua fill pas protestës së organizuar nga AGSH pas aksionit policor që bllokoi hyrjen e gazetarëve dhe punonjësve të Focus Media Group dhe bllokoi sinjalin e transmetimit për televizionin informativ, News 24. Megjithatë, duket se postimet e saj datojnë që prej muajit Mars 2025.
AGSH përgënjeshtroi postimet e kësaj faqe, duke i quajtur ato qartazi shpifje.
“Bordi hedh poshtë këto shpifje që synojnë të dekurajojnë përkrahjen tonë të drejtë në mbrojtje të kolegëve,” shkruhet në reagimin e bordit drejtues të AGSH.
Myzyraj shtoi se pavarësisht politikave editoriale, gazetarët e AGSH janë aty së pari në mbështjetje të lirisë së mediave dhe të drejtave të gazetarëve.
“Kjo është e panegociueshme për ne. Pavarësisht linjës editoriale së mediave, AGSH mbron gazetarët dhe interesin e lirisë së medias”, tha Myzyraj.
Kreu i AGSH I tha BIRN se ata do t’i drejtohen Policisë së Shtetit dhe Sektorit të Krimit Kibernetik për të hetuar këtë situatë.
“Juristët tanë kanë arritur në përfundimin se persona të paautorizuar kanë vjedhur logot dhe stemat e organizatës, e cila është regjistruar sipas të gjitha ligjeve shqiptare në fuqi”, u shpreh kreu i AGSH.
