Meçaj u arrestua pak ditë më parë në Malësi të Madhe, pasi akuzohet se trafikonte armë zjarri drejt Italisë përmes një linje autobuzash.
Sipas një burimi në policinë lokale, indiciet erdhën nga Guardia di Finanza pas ndalimit të dy shoferëve të një autobuzi, pasi në një valixhe brenda bagazhit ishin gjetur armë dhe municione. Më pas, ata janë vënë nën përgjim.
Nga hetimet ka rezultur se 30 vjeçari Françesk Meçaj me datë 16 korrik kishte telefonuar administratorët e linjës me një numër italian dhe u ka kërkuar trasportimin e një valixheje që sipas tij kishte ushqime. Takimi është realizuar në Milot, ku 30 vjeçari kishte dorëzuar valixhen së bashku me 50 euro. Tre javë më pas, i njëjti person ka telefonuar sërish agjencinë për një dërgesë në Itali. Edhe kësaj radhe, takimi është realizuar në Milot ku fiksohet në kamera se dorëzon valixhet.
Autoritetet italiane ndaluan furgonin, ku u kapën 5 armë kallashnikov, 5 krehëra dhe 356 fisheke. Në pranga atje kanë përfunduar dy shoferet Arian Deda dhe Eltion Muça, ndërsa autoritet italiane janë në kërkim të një shtetasi Italian që do të priste valixhen me armë zjarri.
